A voceira municipal do BNG en Viveiro, Míriam Bermúdez, anunciou que vén de remitirlle un escrito á Deputación de Lugo para instar ao goberno provincial a colocar barreiras de protección na estrada de titularidade provincial CP-6502 que atravesa a parroquia viveirense de Chavín e conecta este concello cos concellos de Vilalba, Muras e Ourol.

O Bloque viveirense remarca que se trata dun vial “estreito, de curvas perigosas sen visibilidade, que non conta con beiravías nin arcéns, cun firme en mal estado e intransitable en varios tramos”. Bermúdez engade que “a perigosidade agrávase ao carecer nas súas marxes de elementos de protección para os condutores que circulan por esta estrada na que se atopan con pendentes e barrancos pronunciados en varios puntos do seu trazado”.

Os nacionalistas urxen á Deputación a que leve a cabo a instalación de barreiras de protección nesta estrada de titularidade provincial, na zona coñecida como A Maraleixa, “posto que nas ultimas semanas viñeron facéndose traballos de tala de masa árborea nesta área, onde as árbores que estaban nas marxes da estrada provincial e que servían de elemento natural de contención para os vehículos foron eliminados”. Isto supón “un perigo engadido”, remarcan.

Desde o BNG de Viveiro demandan tamén a renovación e colocación destas barreiras de protección e seguridade “en todos aqueles tramos perigosos” das estradas de titularidade provincial que discurren polo termo municipal de Viveiro (2604, 2610, 3810, 6412, 6601, 6602, 6603, 6604, 6605, 6606, 6607, 6608, 6610, 6611, 6612 e 6613).

Os nacionalistas viveirenses piden que se inclúa “unha barreira de seguridade especial para motoristas e ciclistas co obxecto de reforzar a seguridade destes colectivos vulnerables, axudando a reducir a gravidade das lesións e evitae as posíbeis amputacións ou lesións medulares que podan sufrir en caso de accidente”.

Por outra banda, expón o BNG viveirense, que asegura facerse eco “de numerosas queixas recibidas e do malestar da veciñanza polo lamentable estado das estradas de titularidade provincial”, o grupo municipal nacionalista reclama á Deputación unha “auditoría de calidade permanente do estado das estradas (pavimentación, seguridade, trazados, sinalización horizontal e vertical, índices de siniestralidade, ano de execución de obras e actuacións de traballos posteriores de conservación e mantemento en cada unha delas) co obxecto de garantir que as empresas cumpran correctamente co servizo contratado”.