EFE. O presidente do Goberno, Pedro Sánchez, presentou este martes o plan de desescalada do coronavirus que se estrutura en catro fases tras as que, se todo vai ben, o país podería entrar nunha etapa de “nova normalidade” a finais de xuño.
O chamado “Plan para a transición cara a unha nova normalidade” aplicarase de forma gradual, asimétrica -os territorios de aplicación deberán cumprir cos indicadores estipulados polo Goberno-, e terá como referencia territorial a provincia ou a illa, con limitacións á mobilidade entre elas ata que se chegue ao final do proceso.
As catro fases para a transición cara á nova normalidade previstas no plan aprobado este martes polo Consello de Ministros terán unha duración mínima de dúas semanas, que é o período de incubación do virus, polo que, no mellor dos casos, o plan no seu conxunto terá unha duración mínima de seis semanas.
limitarase a mobilidade das persoas ata a fase final do plan, coa provincia como referencia
FASE 0
Trátase dun intervalo de preparación, que comprende a fase actual na que, ademais das medidas de alivio comúns para todo o país, como as saídas reguladas dos menores de 14 anos desde o pasado domingo, ou as previstas para o vindeiro sábado, día en que se poderá saír a dar un paseo ou a facer deporte de forma individual, “abriranse pequenas fendas de actividade económica”. Como exemplos, o presidente citou a apertura de locais con cita previa para atención individual dos clientes; a de restaurantes para levar comida a domicilio sen consumo no local; a apertura de adestramentos individuais de deportistas profesionais e federados; e o adestramento básico de ligas profesionais.
As perruquerías poderán abrir de concertar cita previa e cumprir medidas de aforo. Sen estes requisitos, deberán esperar á fase 1.
FASE 1
Permitirase en cada espazo territorial definido, en principio a provincia, o inicio parcial de certas actividades, como o pequeno comercio con condicións estritas de seguridade; en restauración, a apertura de terrazas con limitación ao 30% de ocupación; en hostalería, a apertura de hoteis e aloxamentos turísticos excluíndo zonas comúns e tamén con determinadas restricións.
na fase 1 abrirán o pequeno comercio, terrazas e lugares de culto, limitando os aforos a un terzo
Nesta fase, incluirase un horario preferente para os maiores de 65 anos; no sector agroalimentario e pesqueiro renovaranse as actividades que mantiñan restricións; os lugares de culto poderán abrir limitando o seu aforo a un terzo; no ámbito deportivo contémplase a apertura de centros de alto rendemento e permitirase o adestramento en ligas profesionais.
Tamén nesta fase 1 se permitirá a celebración de velatorios “baixo determinadas circunstancias”.
FASE 2
Na fase intermedia, abrirase o espazo interior dos locais cunha ocupación dun terzo do aforo e garantías de separación de mesas; aínda que o curso escolar non comezará ata setembro, reabriranse os centros educativos para actividades de reforzo, para garantir que os menores de seis anos poidan acudir a eles se ambos os pais teñen que traballar presencialmente e para a Ebau.
Prevese a continuación de pesca e caza deportiva; a apertura de cinemas e teatros cun aforo limitado a un terzo; serán posibles visitas a monumentos ou exposicións cun terzo de aforo; lugares de culto cun aforo ao 50%; actos e espectáculos de menos de 50 persoas en lugares pechados cun terzo de aforo e, se é ao aire libre, con menos de 400 persoas e todas sentadas.
Esta fase inclúe, con restricións, a celebración de vodas, e a visita a centros de discapacidade e vivendas tuteladas.
OS LOCAIS DE HOSTALERÍA PODERÍAN ABRIR O SEU INTERIOR EN XUÑO E OS COLEXIOS ACOLLERÁN A NENOS DE ATA SEIS ANOS DE SER NECESARIO
FASE 3
Flexibilizarase a mobilidade xeral aínda que se recomendará o uso da máscara fóra do fogar e nos transportes públicos. Limítase o aforo ao 50% e unha distancia mínima de dous metros no ámbito comercial; suavizaranse as restricións de aforo e ocupación en restauración, aínda que se manterán estritas condicións de separación entre o público.
O USO DA MÁSCARA RECOMENDARASE EN DIANTE EN TODAS AS ACTIVIDADES, EXCEPTO NO FOGAR, E O TELETRABALLO SERÁ A OPCIÓN PREFERENTE
Sánchez explicou que a opción do teletraballo manterase como a preferente ata que a desescalada do confinamento alcance “polo menos” a fase 3.
Tampouco poderá facerse ata esta fase, con condicións por concretar, as visitas a maiores nas residencias.
O uso das praias para o baño tamén será nesta fase, con controis por parte das autoridades locais.
CULTURA
No ámbito cultural, estas serán as medidas:
EDUCACIÓN
Os alumnos de cuarto da ESO, segundo de Bacharelato, 2º de FP de grado Medio e Superior e último ano de Ensinos de réxime especial poderán volver ás aulas na fase 2 da desescalada que deseñou o Goberno con carácter voluntario e divididos en grupos de non máis de 15 estudantes.
A reincorporación dos citados alumnos realizarase en función da infraestuctura de cada centro “ao 50% para asistencia alterna ou en semigrupos paralelos”.
Ademais, nesta segunda fase de desescalada permitirase a apertura dos centros de Educación Especial, con asistencia tamén de alumnos con carácter voluntario e suscítase a apertura das aulas de infantil ata os seis anos para as familias que acrediten que os proxenitores teñen que realizar un traballo presencial sen posibilidade de flexibilización e sempre con limitación de aforo.
Nesta segunda fase, os centros prepararán programas de reforzo educativo a desenvolver no centro para os alumnos non mencionados anteriormente.
Segundo as fontes, durante a fase 0 de desescalada fomentarase a educación en liña ou a distancia e na fase 1 os centros educativos abrirán para a súa desinfección, acondicionamiento e o traballo administrativo e preparatorio dos docentes e persoal auxiliar.
Asímismo, establécese a apertura de universidades para a súa desinfección, acondicionamento e para xestións administrativas e de investigación, así como a dos laboratorios universitarios.