O número de casos activos de coronavirus na provincia de Lugo mantense estable, segundo o reconto oficial ofrecido polo Sergas na mañá deste luns. A estatística contabiliza un total de 58 positivos, os mesmos ca onte. O Hospital Público da Mariña segue sen recibir ingresos de infectados polo virus.
Os únicos catro hospitalizados por mor da pandemia permanecen no HULA, dous deles en planta e outros dous na Uci. O Sergas computa 54 casos en domicilio, os mesmos có pasado domingo.
No histórico da provincia, contabilízanse 27 falecementos, cinco deles na Mariña, ademais da morte dun varón que ingresou polo virus e que pereceu na Uci de Burela malia superar a doenza. Déronse 859 altas.
854 INFECTADOS EN GALICIA
A nivel galego, a Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 854, deles 207 son da área da Coruña, 58 da de Lugo, 127 da de Ourense, 36 da de Pontevedra, 255 da área de Vigo, 145 da de Santiago, e 26 da de Ferrol.
Do total de pacientes positivos, 11 permanecen en Uci, 60 están en unidades de hospitalización e 783 no domicilio. Polo de agora, en Galicia hai un total de 9.740 persoas curadas, rexistrándose 614 falecementos. O número de PCR realizadas é de 135.464.
RESIDENCIAS
Nas residencias da Mariña Lucense, o reconto oficial do Sergas documenta un único positivo, o dun maior da vivenda comunitaria privada Mirador del Eo, de Ribadeo. A dirección do centro precisa que este usuario xa recibiu confirmación de que é negativo, despois de realizar un terceiro test nos pasados días.
Deste xeito, o xeriátrico ribadense volve traballar con normalidade.
