A organización cancela o Resu e di “acatar pero non compartir” a decisión do Concello

Os promotores aseguran que o festival en formato reducido era "o máis seguro posible" e remarcan que a anulación prexudica a "provedores, obreiros, hostaleiros, técnicos e grupos"

Concerto de Crisix no Resu. CRISIX/FACEBOOK

A organización do Resurrection Fest cancelou a edición “XS” do festival, en formato reducido e con aforamento limitado, que se ía celebrar en Viveiro do 21 ao 30 de agosto. Os promotores anulan o evento alegando “acatar pero non compartir” as razóns do Concello de Viveiro, que cambiou a súa postura sobre o mesmo para finalmente rexeitar ceder as instalacións municipais para o encontro musical.

O goberno local asegurou a través dun comunicado que valorou “os riscos que poderían darse no exterior” para non conceder os pertinentes permisos. Malia que o aforamento nos concertos estaría limitado a un máximo de 800 asistentes, ao goberno local preocupábanlle posibles aglomeracións fóra do recinto. “Nas rúas e nos espazos públicos non sería posible garantir a seguridade”, argumentou o executivo municipal.

“É unha decisión complicada e difícil que lamentamos ter que tomar, pero fixémolo despois dunha análise pormenorizada e tendo en conta numerosas cuestións. Para o concello o primeiro é a seguridade da veciñanza, vimos de ter un gromo na comarca da Mariña e a situación non é sinxela en toda Galicia, como lemos cada día nos medios de comunicación”, explica a alcaldesa, María Loureiro.

Non entendemos para nada a decisión, cando propoñemos a alternativa cultural máis segura que se pode facer hoxe en día, e cando se levan realizando eventos similares durante meses en toda España coas medidas de seguridade e previsión posibles”, expuxeron os organizadores a través dun comunicado pendurado nas redes sociais. As entradas comezaban a venderse mañá xoves, con Angelus Apatrida ou Crisix no programa.

SITUACIÓN “DESPROPORCIONADA E INXUSTA”

“Todos os festivais da marca Fest Galicia poideron realizar os seus ciclos de concertos seguros con aforamento reducido, como o Atlantic Fest, Ribeira Sacra, Sin Sal, ViveNigrán, SonRías Baixas ou Atardeceres no Gaiás, menos nós, o que consideramos inxusto e desproporcionado”, manifesta a nota, que incide en que “de realizarse, sería a actuación con maiores medidas sanitarias que xamais se fixo en Viveiro. Aínda así, o sector da música en directo é un dos que máis está a sufrir. A cultura demostra a diario que é segura, xa que afortunadamente non houbo ningún tipo de contaxio en ningún acto cultural dentro dos centos de concertos que se levaron a cabo e se realizan a día de hoxe”, salienta.

IMPACTO ECONÓMICO

“A nosa intención inicial propoñendo este pequeno ciclo concertos non era máis que revitalizar A Mariña, que tras a crise actual e a de Alcoa, tiña máis necesidade de alternativas que nunca. Esta decisión deixa a moitos provedores de Viveiro sen unha facturación que lles axudaría enormemente a pasar estes meses tan malos, e deixa no aire a moitos traballadores que ían axudar a realizar o evento neste ano tan negro para todos. Tamén supón un duro golpe para os hostaleiros que vían con esperanza poder mellorar os seus resultados estivais, e tamén afunde ás bandas e aos seus técnicos, que están a sufrir como ninguén os efectos devastadores das cancelacións culturais. Sen dúbida, este pau deixa á cultura e Viveiro nun peor lugar que onte”, conclúe a organización.

RESPOSTAR

Please enter your comment!
Please enter your name here