A alcaldesa de Viveiro, María Loureiro, confía en que se realicen máis de 500 probas no cribado masivo que levará a cabo o Servizo Galego de Saúde (Sergas) o domingo ao persoal de servizos, comercios e hostelería, entre outros. O Concello cancelou as inscricións despois de que se anotasen máis de 1.000 persoas para a sondaxe.
Loureiro constatou que “nos últimos días aumentaron bastante o número de positivos” e, aínda que se están realizando cribados de prevención aos contactos dos contactos, “si que co Sergas barallouse a posibilidade de facer un cribado masivo para detectar casos asintomáticos”. E é que a incidencia en Viveiro disparouse, ata situarse en 570 positivos por cada 100.000 habitantes en 14 días. Este venres, o municipio acumula 99 infeccións nos últimos 14 días, dez máis ca na anterior actualización.
Neste contexto, unha vez o Concello emitiu este xoves o comunicado para anunciar este cribado, a alcaldesa agradeceu que “a xente respondeu ben“: “Estamos recibindo unha chea de solicitudes de asociacións de comerciantes ou de xente individual que se dedica ao sector servizos“.
En concreto, apuntáronse “máis de 1.000 persoas”, pero Loureiro estimou que se poida pasar o número de medio milleiro de PCR. Con este cribado no sector servizos, explicou a alcaldesa, perséguese descubrir non só “a orixe” das infeccións, senón “se hai outro brote novo“.
“Houbo un brote en decembro dun núcleo familiar e foise espallando. Tamén temos positivos que, aínda que teñan tarxeta sanitaria de Viveiro, viven noutros sitios”, abordou a rexedora, quen precisamente apostou por facer estas probas servizos “porque a maioría son asintomáticos”.
POSIBLES RESTRICIÓNS
“Non é posible garantir que o Sergas poida chamar a todas as persoas que están apuntadas, por que xa se sobrepasan as 1.000 probas solicitadas, pero coas persoas que agora mesmo xa están apuntadas xa se ve cumprido o obxectivo deste cribado, que era detectar casos asintomáticos e coñecer a incidencia que hai no municipio e, como consecuencia, aplicar restricións máis duras, de ser necesarias”, concreta o Concello.
Dende o goberno municipal agradécese a elevada participación, “pois cremos que coa colaboración de todos os veciños e veciñas de Viveiro vamos a conseguir frear a cadea de contaxios e superar esta situación”.
