EFE. Galicia endurece as restricións contra a Covid-19 desde este mércores e, como mínimo, ata o próximo 17 de febreiro, limitacións xa publicadas no diario oficial da Comunidade e que contemplan o uso da máscara en todo momento, coa única excepción do consumo de tabaco na vía pública aínda que con carácter momentáneo e se a persoa está fóra de lugares habituais de circulación de viandantes.
Durante as próximas tres semanas unicamente estarán autorizadas as reunións de conviventes, limitada a mobilidade ao propio municipio, pechada a hostalería completamente (interior e terrazas), os centros comerciais a fin de semana e o comercio non esencial poderá traballar unicamente ata as seis da tarde. Estes son os apartados máis destacables:
POBOACIÓN VULNERABLE
Maiores de 75 e persoas con problemas demostrados para usar a máscara. Non deben saír en horas de previsible afluencia.
FESTAS
Non se poderán celebrar verbenas nin eventos populares.
PRESTACIÓN DE ASISTENCIA E AXUDA NO FOGAR
Coidadores e persoas coidadas deben ir sempre provistos de máscara, salvo dificultade respiratoria, os casos nos que non hai autonomía ou alteracións de conduta diagnosticadas.
VELORIOS E ENTERROS
Poderá haber cinco persoas por túmulo, excepto conviventes, e un máximo de 15 no exterior. A participación na comitiva para o enterro ou despedida para a cremación do falecido restrínxese a un máximo de 15 persoas non conviventes. As zonas comúns de paso deben usarse unicamente para o tránsito de entrada e saída sen que poidan formarse grupos. O tempo de estancia nas instalacións reducirase ao estritamente necesario para expresar as debidas condolencias, evitando permanecer nas zonas de paso. Os servizos de hostalería existentes nos establecementos funerarios permanecerán pechados ao público.
LUGARES DE CULTO
O aforo máximo terá que ser publicado nun lugar visible. Non se poderá utilizar o exterior dos edificios ou da vía pública para a celebración de actos de culto con acompañamento de público. Tampouco poderán realizarse actuacións de coros ou agrupacións vocais de canto. Non se permitirá o uso de auga bendita e non se poden bicar nin tocar os obxectos de devoción.
VODAS
Ás celebracións tras as cerimonias nupciais soamente poderán acudir as persoas conviventes.
ESTABLECEMENTOS E LOCAIS COMERCIAIS RETALLISTAS
Non poderán superar o cincuenta por cento da súa capacidade total. Pecharán ás seis, no caso de que funcionen cun horario inferior. Ás nove e media poderán baixar a reixa o comercio polo miúdo especializado en produtos alimenticios, bebidas e tabaco; as froiterías; as carnicerías; as peixarías; as panaderías e pastelerías; as tendas de bebidas; as de produtos alimenticios; as de automoción; as ortopedias; as de activos farmacéuticos e as de alimentos de animais de compañía.
MERCADOS NA VÍA PÚBLICA
Non poderán superar o 50% dos postos habituais. Os Concellos poderán aumentar a superficie ou habilitar novos días para o exercicio desta actividade, debendo prestar especial atención á vixilancia do cumprimento das medidas sanitarias e protocolos.
ACADEMIAS, AUTOESCOLAS, CENTROS DE FORMACIÓN E ENSINO NON REGRADO
Priorizarase o modo telemático sempre que sexa posible.
HOTEIS E ALOXAMENTOS TURÍSTICOS
Poderán manter a súa actividade para clientes que se despracen por motivos xustificados (traballo, cuestións médicas…). A ocupación das zonas comúns non poderá superar o 50% da súa capacidade. Poderán facilitar unicamente servizos de hostalería e restauración para os aloxados. As piscinas e ximnasios, de existir, estarán vetados ao uso.
ACTIVIDADE CINEXÉTICA
Está permitida a actividade cinexética en todas as súas modalidades sempre que se realice con carácter individual ou con conviventes. En todo caso, estará sometida ás restricións perimetrais actualmente vixentes.
PESCA FLUVIAL E MARÍTIMA, DEPORTIVA E RECREATIVA
Permitida en todas estas modalidades sempre que se realice con carácter individual ou con conviventes. Ademais, está sometida ás restricións perimetrais actualmente vixentes.
PARQUES E ZONAS DEPORTIVAS DE USO PÚBLICO
Poderán estar abertos sempre que se respecte un aforo máximo estimado dunha persoa por cada catro metros cadrados.
REUNIÓNS LABORAIS, INSTITUCIONAIS, ACADÉMICAS E PROFESIONAIS
Recoméndase que sexan telemáticas. En caso contrario, non se poderá superar o trinta por cento da capacidade autorizada do local. Os máximos son 30 persoas para lugares pechados e 75 ao aire libre. Excepcionalmente poderían elevarse eses límites, aínda que non sen a preceptiva autorización da Dirección Xeral de Saúde Pública.
ACTIVIDADES DEPORTIVAS, COMPETICIÓNS FEDERADAS E ADESTRAMENTOS
A práctica da actividade física e deportiva non federada soamente poderá realizarse ao aire libre de forma individual ou con conviventes e co uso da máscara. Quedan suspendidas as competicións deportivas de nivel autonómico. As competicións deportivas federadas de nivel nacional e os seus adestramentos desenvolveranse de acordo ao establecido pola administración competente e de conformidade coas limitacións estipuladas nos protocolos federativos correspondentes. As competicións deportivas federadas de nivel nacional e os seus adestramentos desenvolveranse sen público.
No ámbito das competicións deportivas oficiais non profesionais de ámbito estatal de modalidades deportivas que poidan implicar contacto e que se celebren en Galicia, deberá terse en conta o seguinte:
– Os equipos e deportistas galegos que participen nesas competicións deberán realizar os adestramentos e a competición en grupos de composición estable e en todo caso haberán de ter test serológicos ou probas similares cada 14 días naturais.
– A totalidade dos membros de expedición dos equipos e deportistas procedentes doutras autonomías que se despracen a Galicia para participar nesas competicións deberán realizar test serológicos ou probas similares en orixe polo menos entre 72 e 24 horas previas á celebración da proba, partido ou competición.
– Tamén deberán comunicar con idéntica antelación ás autoridades sanitarias autonómicas a relación de persoas integrantes da expedición trasladada a Galicia, a data e hora de chegada, o lugar de aloxamento e o tipo de proba de detección da covid-19 á que se someteron.
CENTROS, SERVIZOS E ESTABLECEMENTOS SANITARIOS
Soamente permitirase a presenza dun acompañante por usuario no caso de menores, maiores dependentes ou mulleres gestantes.
TRANSPORTES
Está permitido o desprazamento nun vehículo de persoas non conviventes que traballen xuntas e só para o traxecto de ida e volta ao centro de traballo, así como para que os menores poidan acudir aos seus centros de ensino. Nestes casos, soamente se permitirán dúas persoas por fila de asentos, que deberán ir con máscara. No caso dos taxis, non poderá usarse o asento dianteiro e non poderán ir nun mesmo vehículo non conviventes.
ÁREAS DE SERVIZO PARA PROFESIONAIS DO TRANSPORTE
Os establecementos poderán permanecer abertos en horario nocturno para os únicos efectos de facilitar a estes operarios a alimentación necesaria e o descanso imprescindible. Non poderán dispensarse bebidas alcólicas.
PECHES TEMPORAIS
Espectáculos cinematográficos, teatrais, taurinos, circenses, deportivos, feirais e de exhibición, pirotecnia, actividades recreativas, culturais e sociais, deportivas, de lecer e entretemento, atraccións, restauración, zoolóxicas, botánicas e xeolóxicas; casinos, salas de bingo, salóns de xogo, tendas de apostas, pistas de patinaxe, ximnasios, piscinas, museos, salas de conferencias…
Poderán permanecer abertas as instalacións deportivas nas que se celebren adestramentos ou competicións de ámbito estatal, profesional ou non profesional, cuxos vestiarios e zonas de ducha poderán ser usados cunha ocupación de ata o 30 por cento de capacidade máxima permitida.
HOSTALERÍA
Bares, cafeterías e restaurantes permanecerán pechados ao público e poderán prestar exclusivamente servizos de entrega a domicilio ou de recollida no local. O servizo de entrega poderá executarse ata a medianoite. Evitaranse aglomeracións. Os establecementos de restauración de centros sanitarios ou de traballo que limiten a súa actividade a estes colectivos poderán manter o servizo pero non superar o cincuenta por cento da súa capacidade. O consumo dentro poderá realizarse sentado na mesa, cun máximo de catro persoas por cada unha, conviventes ou que conformen un grupo de traballo estable. Nos centros educativos, o alumnado só poderá facer recollida de alimentos ou bebidas. Os comedores escolares rexeranse pola súa normativa específica.
ACTIVIDADE LECTIVA
Suspéndese a actividade lectiva presencial en escolas oficiais de idiomas, escolas de arte e superior de deseño, escola superior de conservación e restauración de bens culturais, escola superior de arte dramática, e conservatorios e escolas de música e danza.
ACTIVIDADE UNIVERSITARIA
Comezará o luns 8 de febreiro na modalidade non presencial. As datas de avaliacións mantéñense.
ALBERGUES TURÍSTICOS
Pechan.
CLUBS DE XUBILADOS
Suspéndese a súa actividade.
CENTROS DE DÍA
Permanecerán abertos os centros de día de maiores e persoas con discapacidade e os ocupacionais, así como as Casas do Maior.
INTEGRAR A QUENES VIVEN SÓS E VER FILLOS E PARELLA, EXCEPCIÓNS
Cada unidade convivencial das que hai en Galicia estará facultada para integrar a unha única persoa que viva soa, os pais que non convivan cos seus fillos poderán velos e os encontros serán tamén posibles entre as persoas con vínculo matrimonial ou de parella que non compartan domicilio. Son tres das excepcións contempladas no DOG publicado este martes. Hai algunha dispensa máis, como o acompañamento a menores e maiores, aínda que a recomendación é limitar ao máximo posible a interacción social.
