O número de casos activos de coronavirus na provincia de Lugo baixa a 702, 46 menos ca onte, segundo o reconto ofrecido este xoves polo Servizo Galego de Saúde (Sergas). Desde a anterior actualización detectáronse un total de 22 positivos novos por PCR.
Dos 702 contaxiados, 40 permanecen ingresados, trece menos (13 deles en coidados intensivos, todos no HULA). Os 27 pacientes con Covid-19 en plantas de hospitalización repártense entre o Hospital da Mariña (tres, dous menos), o propio Hospital Universitario Lucus Augusti (21, sete menos), o centro hospitalario de Monforte (dous, un menos) e o Polusa (un).
No histórico da provincia documéntanse 202 defuncións -dato que se refire ás persoas falecidas na área sanitaria, non a lucenses que morreron noutros hospitais-, 10.741 altas e 11.650 casos acumulados desde o inicio da pandemia. Fixéronse 185.060 PCR, o que implica que desde o anterior reconto efectuáronse 1.040 probas.
No que atinxe á situación epidemiolóxica por municipios, Viveiro baixa a once positivos confirmados nos últimos 14 días (un menos ca os comunicados onte), os mesmos que ten A Pontenova. O resto dos municipios da Mariña teñen entre un e nove positivos localizados nas últimas dúas semanas, agás O Vicedo, Ourol, Xove, Trabada, Mondoñedo e Alfoz.