Denuncian a esixencia dun seguro obrigatorio para pescar nos portos galegos

A Asociación Galega de Consumidores e Usuarios (Acouga) súmase ás protestas que haberá en distintos concellos galegos este sábado, entre eles, o de Burela.


A Asociación Galega de Consumidores e Usuarios (Acouga) rexeita a esixencia, por parte de Portos de Galicia, dun seguro obrigatorio para aqueles que queiran practicar pesca deportiva nos portos galegos.

Nun comunicado, Acouga sinalou que a resolución do ente público portuario do 26 de xullo impón aos afeccionados a contratación dunha póliza de seguro de accidentes e responsabilidade civil que cubra os danos propios en instalacións portuarias, cunha cobertura mínima de 300.000 euros, e a terceiros, cun mínimo de 450.000 euros.

O secretario xeral de Acouga, o avogado Xoán Antón Pérez-Lema, advertiu da “eventual nulidade” do requisito, “ao ser adoptado por un órgano manifestamente incompetente e sen seguir o procedemento legalmente establecido”.

Pérez-Lema precisou que na resolución non consta “estudo ningún” dos riscos da actividade que xustifiquen a inclusión do seguro. Tampouco na propia exposición de motivos do texto normativo ofrécese “motivación ningunha desa decisión”.

“Está a vulnerarse o previsto no artigo 87 da Lei de Portos de Galicia, conforme ao cal os criterios para establecer os límites das pólizas, en función do tipo de actividade e do risco inherente a esta, aprobáraos o Consello Reitor de Portos de Galicia, por proposta da persoa titular da Presidencia”, explican.

O avogado apuntou ademais que a “elevada” contía das coberturas previstas “triplica as fixadas por comunidades autónomas como a catalá ou a andaluza, que tamén esixen un seguro obrigatorio para a práctica da pesca marítima recreativa de superficie”.

CONCENTRACIÓNS EN PORTOS GALEGOS

Así, a asociación remarca que a resolución de Portos “infrinxe o principio de proporcionalidade que deben aplicar as accións administrativas que limitan ou condicionan o exercicio de dereitos e actividades”, e mesmo a propia Lei de Portos galega, que precisa que a esixencia desta garantía “deberá ser proporcionada en termos de risco asegurado, fixación da suma asegurada ou límite da garantía”.

Ademais, Acouga indicou que se suma ás accións emprendidas pola Asociación Galega pola Defensa da Pesca Recreativa (Agadper) e chama aos interesados a participar nas concentracións convocadas para o sábado día 18, ás 18,30 horas, nos portos de Burela, Malpica, Muros, Ribeira, Cabo-Escarabote, Ferrol, Sanxenxo, Aldán e Cambados.

1 COMMENT

RESPOSTAR

Please enter your comment!
Please enter your name here