Alomenos dúas mulleres resultaron feridas e foron trasladadas ao Hospital Público da Mariña despois de que se producise unha colisión entre tres coches e un camión no corredor Costa Norte (CG 2.3) á altura do punto quilométrico 4 da estrada en dirección Viveiro–Xove, neste último municipio.

O Centro Integrado de Atención ás Emerxencias (CIAE) do 112 Galicia recibiu aviso do sinistro ás 9.46 horas. Daquela mobilizou ao 061 – Urxencias Sanitarias, aos Bombeiros de Viveiro, ao Grupo de Emerxencias Supramunicipal (GES) de Cervo, á Garda Civil de Tráfico e Protección Civil, ademais dos servizos de mantemento da estrada.

Segundo o propio 112 Galicia, ningún dos ocupantes dos catro vehículos requeriu de excarceración. Fontes do Hospital da Costa confirman que o centro hospitalario acolleu a dúas mulleres, que están sendo sometidas arestora a probas para confirmar o alcance das súas lesións.