Os servizos sanitarios de urxencia trasladaron a un traballador que sufriu un corte profundo cunha motoserra nun monte no municipio do Vicedo (Lugo).

Segundo informou o 112 Galicia, os feitos sucederon á tardiña cando o home realizaba traballos no monte, a un quilómetro da localidade do Vicedo.

Ao lugar acudiu persoal sanitario e axentes de seguridade despois de recibir o 112 Galicia unha chamada de alerta sobre as 19.00 horas do pasado luns.

En concreto, confirmaron fontes sanitarias, ao lugar o 061 enviou unha ambulancia de soporte vital básico e outra de soporte vital avanzado, así como un equipo sanitario de Atención Primaria de Viveiro para atender ao home, G. R. A., de 26 anos, que foi evacuado ao Hospital da Mariña.

Unha vez no lugar do accidente, o equipo de Urxencias Sanitarias de Galicia-061 puido comprobar que o traballador presentaba un corte profundo nunha man provocado pola motoserra, concretaron por parte do 112.