Agredido o persoal da ambulancia medicalizada de Foz mentres se atopaba nunha asistencia

A enfermeira e o técnico de emerxencias sanitarias (TES) do servizo precisaron asistencia médica tras recibir dunha muller patadas na cara, no peito e nun ombreiro

Ambulancia medicalizada. AXM

O persoal da ambulancia medicalizada do 061 con base en Foz sufriu a pasada noite unha agresión mentres se atopaban realizando unha asistencia sanitaria na mesma vila, na rúa Corporacións Municipais arredor das 22.00 horas. Como consecuencia, dous membros do equipo, a enfermeira e o técnico de emerxencias sanitarias (TES), precisaron acudir ao Hospital Público da Mariña polas lesións ocasionadas.

Segundo contou un dos afectados, o equipo foi alertado para asistir a unha persoa que se atopaba alterada na rúa, para o que, segundo lles indicaron, tamén se mobilizou unha patrulla da Garda Civil como apoio.

DECIDIRON INTERVIR DE URXENCIA

Á súa chegada á zona, e malia que aínda non chegaran os axentes, o equipo non quixo demorar a súa intervención e dirixiuse a asistir á muller. “Camiñaba con pouca estabilidade, con risco de facerse dano, e estaba moi agresiva”, explica o persoal.

A muller estaba soa e levaba “toda a tarde increpando aos veciños da zona”. Deste xeito, esta persoa “insultounos e escupiunos” en varias ocasións, sinala o sanitario afectado.

Posteriormente, e mentres a enfermeira tentaba tranquilizala administrarlle medicación, a sanitaria recibiu sorpresivamente “unha patada na cara“, contou un afectado, que “a desprazou varios metros cara atrás e quedou aturdida“. O TES acudiu a auxiliar á súa compañeira, momento no que el tamén foi agredido con varias couces no peito e nun ombreiro.

A SUPOSTA AGRESORA FOI DETIDA

Ante a agresividade da muller, que seguiu golpeándoos, o equipo sanitario pediu “auxilio” á central “ata en tres ocasións“. Os axentes, apunta unha das vítimas, chegaron “15 minutos despois“.

Tras tombar á muller para “evitar que se fixese dano” e conseguir sedala, os agredidos precisaron tamén asistencia hospitalaria. Segundo contou un dos afectados, foi necesaria unha exploración e probas médicas por lesións na cara, o peito, o estómago e un ombreiro. Ambos interpuxeron denuncia polo ocorrido e, afirmaron, a agresora foi detida á espera de que se practiquen dilixencias.

O RECORTE DUN TES NO SERVIZO “INFLUÍU NEGATIVAMENTE”

O sanitario afectado, á espera da citación para prestar declaración, explica que “neste tipo de situacións” os profesionais notan o recorte dun TES na ambulancia medicalizada, “porque non é o mesmo contar cunha dotación completa, non podemos facer o mesmo. Influíu moi negativamente, está claro, e tampouco poidemos contar co vehículo asistencial básico de Foz porque acababa de pechar“.

A fonte consultada explica que, a pesar das molestias físicas, con dores e limitacións do movemento a causa dos hematomas, a afectación foi máis “psicolóxica“, porque considera que “esto é un antes e un despois e nunca vivimos nada así. Volves traballar con certo recelo”, lamenta.

RESPOSTAR

Please enter your comment!
Please enter your name here