EFE. A Garda Civil imputou a un mozo de 19 anos e veciño da localidade lucense de Ribadeo como presunto autor de senllos delitos de danos en tres autobuses de ALSA que quedaron inutilizados para o servizo e un de roubo con forza nun colexio de Vegadeo, segundo informou este venres a Comandancia de Oviedo.

No entanto, a Garda Civil desvinculou os danos ocasionados nos autobuses do conflito laboral que os traballadores de ALSA mantiñan no momento de producirse os desperfectos.

Os feitos ocorreron o pasado día 6 cando tres autobuses que a empresa tiña estacionados no recinto feiral da Veiga sufriron danos intencionados nos depósitos de combustible.

Segundo o Instituto Armado, o mozo puido forzar o tapón do combustible para introducir substancias líquidas.

Entre os feitos que se lle imputan resaltan os danos causados na caixa rexistradora dun dos autobuses e os desperfectos noutro dos vehículos cando presuntamente intentou queimar o seu interior, ascendendo o seu valor a 1.700 euros.

A Garda Civil tamén considera ao mozo como presunto autor dun roubo con forza no Colexio de Educación Primaria Jovellanos de Vegadeo tras acceder ao seu interior rompendo unha fiestra.

A Policía Xudicial da Garda Civil realizou senllas inspeccións oculares, tanto nos autocares como no colexio, que constataron a vinculación entre ambos casos. O mozo xa prestou declaración en calidade de investigado e non detido, segundo fontes policiais.