A Organización de Produtores Pesqueiros (OPP) Lugo presentou este xoves na lonxa de Burela un calendario-recetario de 2019 para fomentar o consumo da pescada do pincho do porto burelés.
O almanaque de parede, que conta con achegas de catro chefs do Grupo Nove Cociñeiros, é unha das patas dunha campaña de promoción anual da pescada do pincho de Burela que comenzará no Nadal e que incluirá unha presenza activa nas redes sociais e outras actividades que se anunciarán nos próximos días, entre elas unha de carácter social.
O xerente da OPP Lugo, Sergio López, asegurou que a campaña pretende incidir en catro ideas. A primeira delas é que o consumo de peixe é saudable. As posibilidades gastronómicas da pescada, “infinitas”, é outra das bazas que se quere xogar.
A campaña tamén fará fincapé na arte selectiva do pincho, que garante unha “máxima calidade”.
A OPP RESALTA QUE A LONXA BURELESA “É A DE MAIOR VOLUME DE GALICIA EN QUILOS E FACTURACIÓN”
Por último, a OPP defende que “Burela é a capital da pescada do pincho, porque é a lonxa de Galicia con maior volume tanto de quilos como de facturación desta modalidade de pesca e desta especie”, afirma López.
Dentro da campaña, o calendario-recetario ten un afán divulgativo. “Presentamos doce formas distintas de comela durante todo o ano, porque se trata dunha especie non temporal e que mantén unha relación calidade-prezo estable durante todo o exercicio”, sostén o xerente da OPP.
PREPARACIÓN
A agrupación confiou nos cociñeiros do Grupo Nove, que elaboraron as doce preparacións do almanaque con produtos de proximidade e de tempada, en función dos elementos culinarios que hai cada mes do ano.
Miguel Ángel Campo, chef do restaurante A Gabeira, Ferrol, realizou así unha cococha de pescada do pincho de Burela ao pil pilou pescada maki, emulsión de pementos de Padrón picantes, ovas de choco e triscante de cigala.
Iñaki Bretal, do Eirado da Leña, en Pontevedra, cociñou o peixe con faba de Lourenzá e níscalos para un prato de outono. Hector López, do Restaurante España en Lugo, preparou un consumé de pescada con crustáceos e moluscos. Tamén participou Beatriz Sotelo, de Decanta-t.
Os cociñeiros destacaron que a pescada do pincho de Burela é un peixe “polivalente” e despexaron dúbidas sobre o anisakis, ao explicar que “cunha cocción de 65º o parásito sempre morre. Trátase dun produto moi san”, explicou Campo, presidente do colectivo.
O calendario-recetario distribuirase primeiro a nivel local -asociados, exportadores- e despois a través de organizacións -peixerías, produtores, consumidores- para chegar a todos os recunchos de España.
TRINTA BUQUES E 150 EXPORTADORES
O xerente de Armadores de Burela, S. A. (Absa), Miguel Neira, destacou que é cedo para ofrecer unha valoración do exercicio no tocante a esta especie, dado que os datos non están pechados.
“Si podemos prever que haberá unha baixada de capturas e de ventas de certa importancia, e tamén unha alza do prezo medio“, indicou.
Neira destacou que “máis de 30 buques comercializan no porto de Burela a súa pescada do pincho, ademais de 150 exportadores que fan que chegue a calquera punto de España nun tempo récord, o que é un sinónimo de calidade”.
