O Servizo Galego de Saúde (Sergas) incorporará un total de 27 profesionais sanitarios a través de concurso de méritos no distrito da Mariña –20 deles no hospital de Burela– e outros 25 no sur da provincia de Lugo –21 no hospital de Monforte–, que exercerán con praza fixa durante polo menos dous anos.
Así o avanzou o conselleiro de Sanidade, Xullo García Comesaña, ao responder a senllas preguntas orais formuladas este mércores no Parlamento galego polo BNG. En ambos os casos, recoñeceu as dificultades que hai para contratar facultativos e insistiu en que se trata dun “problema de toda España” e que require medidas “nacionais”.
PROTESTAS NA MARIÑA
Durante o debate, o parlamentario nacionalista Daniel Castro lembroulle a García Comesaña as manifestacións sucedidas nos últimos anos na Mariña, comarca que “está farta” desde que en 2018 quedou sen a área sanitaria propia. A isto engadiu as denuncias dos usuarios do Sergas pola falta de facultativos e pediatras en centros de saúde.
O conselleiro de Sanidade, na súa resposta, destacou as medidas implantadas polo Sergas para toda Galicia e, no caso do hospital de Burela, puxo como exemplo que desde 2014 conta con servizo de Oncohematoloxía que “evitou que máis de 3.000 pacientes tivesen que desprazarse a Lugo”.
