A Consellería de Medio Ambiente, Territorio e Vivenda reforzará a retirada de niños de velutina nunha vintena de concellos con superficie en Rede Natura, entre eles dous da Mariña Lucense, Ribadeo e Viveiro.
A conselleira deste departamento, Ángeles Vázquez, trasladou á Agrupación Apícola de Galicia que no 2019 priorizaranse estas accións nestes municipios co obxectivo de conter a proliferación da avespa asiática.
Na provincia de Lugo, a Xunta de Galicia tamén reforzará a retirada dos niños en Chantada, Sober, Samos, Muras e Abadín.
Monfero, San Saduniño, A Capela, Melide, Toques, Santiso, Calvos de Randín, Trasmiras, A Lama, Bueu, Cangas, A Illa de Arousa, Silleda e o Parque Nacional Illas Atlánticas son os outros municipios que se verán beneficiados pola campaña.
PROXECTO POSITIVE
Vázquez fixo fincapé na necesidade da colaboración cidadá para a localización dos niños e lembrou que a Xunta participa no proxecto Positive, unha iniciativa para o intercambio de experiencias e coñecementos para o control desta especie entre os países do sudoeste europeo.
O proxecto, cun orzamento de case dous millóns, conta con financiamento nun 75% do fondo FEDER, promove a transmisión de coñecemento e experiencia dos socios máis experimentados, como Francia, aos que levan menos tempo convivindo coa especie, como España e Portugal.
