A Deputada de Muller e Igualdade, Marisol Morandeira, participou este venres en Foz xunto ao alcalde do municipio e tamén deputado de Recursos Sostibles, Francisco Cajoto, na presentación da segunda edición do Festival Vrao, “unha cita que converterá ao municipio e á comarca da Mariña no epicentro da mellor música galega”.

O próximo 12 de agosto o festival reunirá a bandas e artistas de diferentes estilos musicais. A institución provincial colabora cunha achega económica de 15.000€ para organizar o encontro e avanzar para “consolidalo como un referente no calendario de festivais da comarca e da provincia de Lugo”.

“Facémolo porque é un festival que enriquece a oferta cultural da provincia cunha proposta moi atractiva que potencia o talento galego; porque esta propueta ten un retorno económico importante para Foz e para a comarca en sectores como o da hostalaría e o comercio, que son fundamentais; e porque favorece o modelo de turismo de calidade e de experiencias polo que traballamos desde a Deputación, e que comparte o propio Concello e a Mancomunidade de Municipios da Mariña”, explicou Morandeira.

O CARTEL

O Festival Vrao celébrase en Foz o vindeiro sábado 12 de agosto, como fin ás festas de San Lourenzo.

Entre as bandas que soarán durante a xornada, destacan grupos de estilos como o funk, o soul, o folk ou hip hop, con nomes tan recoñecidos como Sabela King and the Heartbreakers, Boyanka Kostova, NingúnDJ, Malandrómeda ou Grande Amore.