-Que é o Ceibarrimas e cal é a finalidade do mesmo?
Consiste en facer “batallas de galos” de rap en galego. Segundo unha base de rap van improvisando segundo as palabras que vaia apuntando a organización dependendo da modalidade da “batalla”. Tamén haberá un micro aberto por se alguén quere subir e improvisar e por último haberá concertos de rap.
-Quen participará nos concertos de rap?
Pois actuarán C Mirazo, que son de Carballo, Xmaseda65 que é de Viveiro, logo veñen Willow GHZ desde Ponteareas, Shera e Sile de Vilalba e DJ Breixán e Román.
-Cantas persoas participarán na “batalla de galos”?
Están apuntadas doce mais esperamos que se animen outras e outros competidores. Moitos son de fóra de Mondoñedo, veñen desprazándose coa Asociación “Merenda Creativa”.
-Onde se celebrará a “batalla”?
Será no Casino de Mondoñedo, un edificio histórico da vila e será o 2 de decembro a partir das 18:00.
-O micro aberto tamén pode servir para que alguén de Mondoñedo ou da zona poida dar a coñecer as súas habilidades?
Si, claro, se algún rapaz ou rapaza non tivo nunca oportunidade de mostrar como rapea, que só o fai na súa casa, pois aquí ten a oportunidade de cantar diante dun público.
-Tedes todo dividido en diferentes categorías.
Si, temos a clasificatoria, que dependendo da xente reunida, poderá facerse segundo diferentes modalidades. Se por exemplo hai 16 persoas, haberá un sorteo e iremos a oitavos directamente para pasar a cuartos de final. Senón, organizaremos a batalla para que queden oito persoas xustas para os cuartos de final.
-Haberá un xurado que valore as interpretacións das diferentes competidoras e competidores?
Haberá un xurado de tres persoas, un deles é un integrante de Shera e Sile que logo darán un concerto, outro é Xosé Maseda, quen tamén dará un concerto e unha terceira persoa con estudos de Filoloxía.
-Que se vai valorar cando unha persoa suba ao escenario e comece a súa interpretación?
Valorarase tanto a parte escrita, a rima en si e o ritmo de rap e a improvisación. Mais todo depende da modalidade en que compitan e segundo a palabra que aparecerá nunha pantalla e eles deberán traballar sobre ella e tamén o público pode elixir as palabras. Hai diferentes estilos nestas batallas. Unhas veces son sen base, libre e a capella, unhas veces son catro patróns cada un e outras veces son oito. Isto depende máis de Merenda Creativa quen organizan estes eventos.
-Cal é o obxectivo final de Ceibarrimas?
Dar a coñecer o rap nesta zona e darlle unha oportunidade a xente que faga este estilo de música para participar nun concerto. Direi que este é o primeiro encontro deste tipo en Mondoñedo, sei que en Santiago xa se celebrou máis veces.
-Como naceu a idea de celebrar este primeiro Ceibarrimas?
Algúns de nós vivimos en Santiago e tivemos a oportunidade de ver estas “batallas de galos”. Pareceunos un modelo interesante e atractivo e quixemos traelo á nosa vila.
-Por tanto existe unha afección ao rap pola vosa parte que xa vén de antes.
Somos asistentes habituais a este tipo de concertos e tamén somos afeccionados ou melómanos do rap.
-Que debe ter para ti unha persoa con desexo de participar nunha pelexa de galos?
Non ter medo, tirar para adiante, capacidade de improvisación, moito léxico porque na rima é importante saber por onde saír.
-As persoas do xurado xa levan as normas redactadas?
Xa van redactadas pola organización. En tal caso, Xoldra organiza o evento en colaboración con Merenda Creativa quen son os que levan o tema de normas. Nós organizaremos o evento que, apunto, está aberto a todos os públicos.
