O conselleiro de Sanidade, Xullo García Comesaña, apuntou que o pico de gripe en Galicia chegará a mediados de xaneiro e animou á poboación a vacinarse. Así o avanzou nunha entrevista na Cadea Ser e que recolleu Europa Press, onde lembrou que os recintos masivos de vacinación estarán abertos ata o próximo día 9 de decembro.
Por outra banda, interpelado sobre a manifestación de hai uns días na Mariña ante “a deterioración” da sanidade nesa comarca, detallou que a Xunta “nunca negou” que hai “un problema importantísimo” de falta de especialistas, especialmente en Medicina Familiar e Comunitario e tamén en Pediatría e Atención Primaria, engadiu.
Con todo, subliñou que este problema “non pasa en Galicia, non é culpa do PP”, senón que tamén pasa “noutras comunidades autónomas”. Así, continuou, a cuestión é que “non hai médicos especialistas” por diferentes situacións.
Por unha banda, explicou, porque moitos profesionais finalizan o seu período de actividade e porque “non hai un sistema” que axuda a formar os médicos necesarios para cubrir “ese alto número” de persoas que se van.
“Por iso, algunhas comunidades autónomas levamos seis anos pedindo ao Ministerio que nos deixe formar máis médicos de familia e máis pediatras”, remarcou. Para Comesaña, esa petición é “clamar no deserto” xa que pasan anos, ministros e gobernos e “continúa igual” e lembrou que a Xunta pediu formar a 1.000 médicos de familia cada ano.
Con todo, o Ministerio de Sanidade “non facía nada”, pero o Partido Socialista e o BNG “votaron que non a esas medidas”. “Curiosamente, o PSOE e o BNG están nesa manifestación en Viveiro coma se non tivesen nada que ver con que non teñamos máis médicos”, puntualizou.
PREOCUPADO QUE O MINISTERIO ESTEA EN MANS DE SUMAR
Comesaña tamén dixo estar preocupado por que o Ministerio de Sanidade recaia en Sumar, xa que “non ten experiencia ningunha en xestión” desta área. Ademais, destacou que a relación co anterior ministro de Sanidade, José Miñones, “foi correcta” e o PSOE “si” que tiña esa experiencia, “este (Sumar) partido non”.
A continuación desexoulle “o mellor” a Miñones na súa carreira política e profesional e lembrou que a el lle esixiron que os “deixase formar a máis médicos”, apostilou. “O certo é que pasou e non formamos a máis médicos, en verdade ao contrario, os borradores que vimos tanto da especialidade de urxencias como da Atención Primaria dábanos a sensación de que iamos poder formar a menos”
Con respecto á nova ministra de Sanidade, Mónica García, o titular galego insistiu en que o PSOE “renunciou” á xestión desta área. “Acaba de entregarlla a Más Madrid e o PSOE non quere xestionar a sanidade pública. Un dato curioso”, puntualizou. Preguntado sobre “se lle preocupa” que sexa un ministro de Sumar o encargado desta carteira, Comesaña foi claro: “A verdade é que si”.
“Preocúpame primeiro porque non ten experiencia ningunha en xestión, nin o Ministerio, nin en ningunha comunidade autónoma onde xestione, onde estea a ver os problemas que temos. O PSOE si que tiña esa experiencia e este partido non. E preocúpame que sexa un Ministerio que se dedique a confrontar con todas as comunidades autónomas ou con algunha en especial”, esgrimiu.
