Xermán Pérez Vilalba (Mobles Gama)
-Como comezou esta aventura de seguir cunha empresa de mobles durante a crise económica e da construción?
A empresa comezouna o noso pai e despois os fillos collemos o timón para non rendernos e buscar fabricar un produto de calidade e aquí seguimos. A nosa especialidade son os dormitorios e a melamina. Son armarios de portas corredoiras ou portas batentes acompañados de mesas de noite, cabeceiros e cómodas.
-Cales son os materiais que máis traballades?
Usamos taboleiros de aglomerado. Nós cortamos e fabricamos en base a ese produto.
-E quen son os vosos principais clientes?
Moblerías de toda Galicia, tamén de Asturias, Ponferrada e León.
-Como foi coller o negocio e presentarvos de cara aos potenciais clientes?
Temos un catálogo que levamos ás moblerías e logo quen quere traballar con nós pon un expositor e en base a iso traballamos. Temos representantes e contacto de fábrica cos clientes. Basicamente é darlle confianza aos clientes. Nós non vendemos a público senón a moblarías, pódese dicir que a profesionais.
-Dentro do voso traballo como se consegue a confianza do cliente?
Ofrecendo un produto óptimo e servindo en prazo, tempo e forma. Nós facemos a entrega en tres semanas de media.
-Se algún cliente vos pedise facer algún traballo en madeira “maciza” de castiñeiro ou carballo, por exemplo, abordariádelo?
De momento non, ese é outro tipo de fabricación onde de momento non temos entrado.
-Os clientes demandan algún tipo especial de moble segundo épocas do ano?
Hai picos de consumo como en todo tipo de mercado. Durante o verán por exemplo, hai persoas que alugan pisos ou casas entón necesitan ter mobles preparados xa de maneira rápida. O reto é que haxa un consumo estable e cada vez maior. Intentar que o estacional sexa o menos posible.
-Tamén este traballo vos obrigará a seguir os gustos de determinados momentos.
Si, seguimos cales son as tendencias que buscan os clientes e desa maneira poder ti responder a ese tipo de peticións.
-Cal foi a encarga máis curiosa que tivestes?
A ver, intentamos non meternos en encargas difíciles porque ao final poden complicarse e non saír adiante.
-Cando decidistes emprender e continuar coa empresa do voso pai, non houbo quen vos dicía non arriscar?
Ás veces parece que hai un alo negativo cara todo aquilo que é emprender e no noso caso continuar. Debes centrarte e concentrarte en fabricar e dar o máximo da experiencia acumulada para priorizar os mellores puntos que tes.
