As reticencias da veciñanza fronte ás obras da segunda fase do parque eólico das Sasdónigas, en Mondoñedo, medran.

Malia contar coa autorización administrativa previa e de construción, o levantamento de actas de ocupación das fincas expropiadas previsto para os días 1, 4, 5 e 6 de febreiro aprazouse, ata o vindeiro 18, ante as alegacións dos titulares dos predios afectados pola Declaración de Utilidade Pública.

ALEGACIÓNS DOS PROPIETARIOS

Os veciños chamados ao acto administrativo -donos de máis de corenta fincas, “case a metade dos terreos do parque”- alegaron “erros na identificación de fincas e propietarios”  e “diferenzas de medida entre plano e realidade de ata un 20 por cento” para solicitar a anulación do procedemento.

Os titulares manteñen que o trámite se realizou de “forma irregular” ao non permitirselles facer as medicións in situ e quéixanse de que os representantes da administración “actuaron de forma parcial, favorecendo á empresa e de costas aos propietarios”.

“NON SE PODEN OCUPAR”

A Dirección Xeral de Minas deberá decidir sobre as alegacións presentadas tanto polos titulares como pola eólica Norvento, que defende a validez do procedemento.

A Conselleria de Economía e Industria aclara que “a execución das obras non se poderá realizar ata que non se dicte a ocupación definitiva”.

“IREMOS ATA O FINAL”

Os titulares dos terreos afectados polas expropiacións manteñen que “irán ata o final” para tratar de revocar o procedemento e “tombar” o proxecto, “recurrindo ao contencioso-administrativo” ou “esixindo responsabilidades pola vía penal”.

“Sempre tivemos unha actitude de colaboración coa empresa, pero están actuando cun desprezo e unha prepotencia inadmisible, comezando a traballar nas fincas sin autorización ningunha”, comentou o voceiro dos afectados, Miguel Chao.

Os afectados polas expropiacións rexeitaron as ofertas realizadas pola empresa Norvento, que consideran “miserables” e “ridículas” con respecto aos prezos pagados por terreos en concellos próximos como o de Abadín.

AFECTACIÓN AO PATRIMONIO

Ademais, pese ás autorizacións coas que conta o proxecto, veñen denunciando que as obras atentan contra os valores patrimoniais e naturais da zona, lugar de paso do Camiño Norte de Santiago ou do Camiño Real que unía Mondoñedo con Betanzos e Ferrol.

A veciñanza sostén tamén que os traballos afectan aos humidais do nacemento do río Gontán.

O grupo municipal de En Marea en Mondoñedo apoiou as reivindicacións dos veciños con asesoramento legal, recursos administrativos e denuncias no Parlamento galego.