A feira náutico-pesqueira Expomar ampliará a súa superficie ata alcanzar os 4.000 metros cadrados para acoller 120 stands e arredor de 300 marcas. No encontro presentarase un estudo sociolaboral da pesca en Burela.
O presidente da Fundación Expomar, Alfredo Llano, explica que nas últimas horas celebrouse unha xuntanza da comisión organizadora para ultimar os detalles do evento, que se celebrará en Burela do 9 ao 12 de maio.
Ao longo das xornadas técnicas, que se celebrarán nesta edición o xoves e mailo venres, presentarase un informe sociolaboral da pesca en Burela e analizaranse cuestións de interese para o sector. Ademais, celebrarase o Consello Galego de Pesca, paralelamente á feira.
Llano explicou que o mencionado estudo “é extraordinario e vai ter moita importancia nesta feira. Tamén se vai tratar o plan estratéxico da Confederación Española de Pesca (Cepesca) no ámbito social”, precisou.
Llano engadiu que “con respecto aos temas de xestión pesqueira, que se abordarán o venres, farase unha análise da posta en marcha dos plans de xestión, as novidades sobre o Brexit e a repercusión que pode ter sobre o sector pesqueiro. Finalmente falarase da Política Pesqueira Común (PPC)”, conclúe.
REFERENCIA A NIVEL ESTATAL
Para o alcalde de Burela, Expomar “é agora unha das feiras máis notorias de todo o Estado español pola calidade dos seus stands e polas xornadas técnicas, que consideramos que son interesantísimas e actuais. E tamén temos o encontro empresarial, ao que se engadirá este ano o Consello Galego de Pesca”, concluíu.
