En Marea atribúe ás obras do parque eólico de Sasdónigas, en Mondoñedo, o estado da lagoa coñecida como Charca da Cabrita.
A formación denuncia que o acuífero “secou” polos traballos que a empresa Norvento está a realizar na zona e que tamén levantaron as críticas da veciñanza polas “irregularidades” na tramitación das expropiacións dos terreos e polos “danos” ambientais e patrimoniais.
“Os intereses privados prevaleceron sobre o ben común e a depredazón ganhou a conservación medioambiental”, lamentou a formación política a través das redes sociais.
“Quén aprobou esta desfeita e quenes ficaron calados deberan dar a cara, pero non acreditamos en que o fagan. Nos xa o denunciamos na Fiscalía e ímos levar o tema ao Parlamento de Galicia“, conclúen.
DENUNCIA NA FISCALÍA
A comezos de marzo, a formación presentou unha demanda por danos ao patrimonio ante o Ministerio Fiscal. O escrito argumentaba que os traballos están a afectar ao tramo do Camiño Norte de Santiago que atravesa a zona.
Este martes, ampliaron a denuncia resaltando tamén os “incumprimentos” en relación coa Declaración de Impacto Ambiental por parte da empresa. O documento sinala a desprotección “das augas e dos leitos fluviais”.
Desde o inicio das obras, en outubro, a formación trasladou a problemática ao Parlamento galego e ao Congreso dos Deputados.
No plano xudicial, presentaron un recurso de alzada contra a autorización do parque, que consideran “irregular”. Argumentan que o proxecto se tramitou en fases separadas para eludir controis administrativos e cargas tributarias. O recurso está pendente de resolución.
LUGAR DE REPOUSO E ALIMENTO PARA OS ANIMAIS
A lagoa, nomeada pola súa forma, é unha das reservas de auga que salpican os montes do arredores de Mondoñedo. Situado no límite entre Cesuras e parroquia de Sasdónigas, o acuífero chegou a alcanzar os trinta metros de diámetro e máis dun de profundidade.
Ademais de ser lugar de repouso e alimento para aves de paso, a reserva daba de beber ao gando que tradicionalmente pacía na zona.
