Germán Paleo Navarro, coa instantánea Estrelas no Roncadoiro, tomada pola noite no faro de Xove, gañou a oitava edición do certame de fotografía Cervo Respecta, que o Concello organiza cada ano para celebrar o Día do Medio Ambiente e que reuniu nesta edición a 19 persoas, procedentes de distintos puntos de Galicia.
37 IMAXES
Valoráronse no concurso 37 fotografías, 12 das cales retrataron algunha paraxe do municipio. O autor da instantánea gañadora levou unha figura da cerámica de Sargadelos e un vale de 150 euros para empregar en establecementos do concello cervense.
Diego Pérez Dopico, coa fotografía ‘O momento‘, realizada no Baleo (Ortigueira), levou o segundo premio, dotado cunha figura de Sargadelos e 75 euros en compras.
Antonio Herrera Huerta levou o galardón Top Cervo, valorado en 50 euros, por ‘Portelo‘.
Participaron na entrega de premios, na sala de exposicións da biblioteca, o alcalde, Alfonso Villares, e a edil de medio ambiente, Manuela Méndez, que destacaron que o Cervo Respecta “é un certame consolidado” que ten como fin “concienciar no respecto ao noso medio ambiente e á nosa natureza, o noso ben máis prezado e máis vulnerable”.
