Do tamaño dun pan de dous quilos, hai poucos días apareceu un fungo colosal a escasos metros do Bar San Pedro, ubicado na parroquia de Mor, en Alfoz. 

Segundo precisan desde o establecemento, trátase dun exemplar da especie denominada fungasapos ou parrocho fumeiro, pois estes fungos, brancos e de escaso peso, adoitan conter unha especie de pó que semella fume se se estoupan.

O tamaño do fungo está a despertar a admiración no local. “Toda a veciñanza acode estes días ao Bar San Pedro para contemplar o fungo prodixioso, pois normalmente son de tamaño inferior a un puño de adulto, mais o encontrado en Correlos supera todo o coñecido“, asegura Mari Carmen Galdo, dona do bar.

EXPOSTO NO LOCAL

Galdo sinala que “ademais de darse nos prados onde paceu o gando, poden nacer nas esterqueiras. O único animal que o consome son os caracois e as lumachas, de feito este exemplar apareceu con indicios de ter sido encetado por este tipo de bichos”, asegura.

O fungo permanece exposto no exterior do Bar San Pedro e todos os días é fotografado por ducias de persoas que desexan inmortalizar o fenomenal fungo.