A Policía Nacional abriu unha investigación para identificar ao autor duns supostos abusos sexuais na madrugada do venres ao sábado durante o Resurrection Fest, despois de que unha moza denunciase os feitos tras recibir asesoramento do punto lila ubicado polo Concello de Viveiro no recinto do festival.
A vítima explicou ás voluntarias do centro de información como un home alto e corpulento -a descrición a partir da que traballan as forzas de seguridade- se puxo detrás dela en actitude libidinosa. A rapaza afeoulle ao suposto acosador a súa actitude, que só cesou cando interviñeron as amigas da moza, para finalmente marchar.
A partir do consello das voluntarias, decidiu interpoñer unha denuncia e a Policía Nacional investiga o ilícito penal.
Foi o único incidente de importancia rexistrado polo punto de asesoramento e prevención da violencia machista, que no seu segundo ano de actividade revelou a súa utilidade a nivel informativo e tamén, valoran os axentes, o seu efecto disuasorio. As forzas de seguridade están convencidos de que, “de darse outro tipo de casos”, similares ou máis graves, “detectaríanse” a través deste servizo.
CIVISMO
Representantes da Policía Local e da Policía Nacional repasaron este luns no consistorio, acompañados da alcaldesa, María Loureiro, os resultados do dispositivo de seguridade que involucrou tamén á Garda Civil e Protección Civil, así como á propia empresa contratada pola organización.
A grandes rasgos, as cifras demostran o civismo do público que desfruta do festival de rock duro de Celeiro.
ESTUPEFACIENTES
Segundo expuxo a Policía Nacional, realizáronse oito intervencións de estupefacientes (principalmente cannabis e anfetaminas) durante os catro días do festival, sen que ningún dos casos tivese trascendencia penal. No tocante ás agresións, houbo dúas denuncias.
ROUBOS
Tamén houbo doce denuncias por furtos de teléfonos móbiles, a maioría deles na xornada do xoves ao venres, principalmente durante o concerto de Parkway Drive.
Grazas a un protocolo de control dos grupos itinerantes que se dedican aos furtos neste tipo de festivais, cun intercambio constante de información en tempo real que permitiu discriminar os roubos dos extravíos e priorizar as actuacións, o sábado foron detidos dous sospeitosos.
OBXECTOS PERDIDOS
No relativo aos obxectos perdidos, foron recepcionados un total de 117, dos cales 31 foron devoltos aos seus donos antes de que abandonasen Viveiro. Quedan por devolver 25 carteiras, cinco bolsos ou mochilas, 16 teléfonos móbiles, cinco reloxos e unha cámara.
Os responsables da Policía Local remarcan que se recibiron tres carteiras con cantidades importantes de diñeiro, unha delas con preto de 1.000 euros. Foron entregadas por seareiros, que deron un exemplo de xenerosidade. Tamén se levaron aos axentes entradas extraviadas que finalmente os seus titulares puideron utilizar.
TRÁFICO
Finalmente, houbo 25 denuncias por cuestións de tráfico, practicamente todos por estacionamentos irregulares. Tanto na chegada dos afeccionados como na operación saída apenas se rexistraron incidentes, máis alá da lentitude da caravana na que os asistentes marcharon de Viveiro.
CRECEMENTO
A falta dunha cifra oficial de asistencia, a organización do Resurrection Fest agardaba acoller 100.000 espectadores, un récord, para o que ampliou o recinto.
Preguntadas pola posibilidade de que o festival continúe medrando –dado que nesta edición congregou a grupos de enorme popularidade, principalmente Slipknot– as forzas de seguridade resaltaron que é preciso contar con prazas abondas de estacionamento -esta edición non se puido utilizar o peirao vello polas obras de acondicionamento da zona-, e que para aumentar o recinto habería que sacrificar unha parte do cámping anexo.
Potenciar o festival, precisaron, require dun reforzo progresivo dos medios materiais, humanos e tamén dun aumento do espazo, ademais de supoñer maiores restricións a nivel de tráfico e maiores controis policiais.
