EFE. A Autovía do Cantábrico (A-8) quedou aberta ao tráfico ás 10.13 horas deste venres logo de permanecer cortada case un día enteiro debido á densa néboa na zona do Alto do Fiouco, entre os municipios de Abadín e Mondoñedo.
A Dirección Xeral de Tráfico (DXT) prohibiu a circulación en ambos sentidos entre os quilómetros 536 e 552 ás 12.36 horas deste xoves.
Como é habitual neste tipo de casos, a Garda Civil habilitou durante este intervalo de tempo próximo a 22 horas desvíos alternativos pola estrada Nacional 634 ao seu paso polo concello de Mondoñedo.
ABERTA CON VISIBILIDADE REDUCIDA
Segundo se pode consultar no mapa de incidencias da DXT, o treito mantense en alerta de nivel vermello por circulación difícil por visibilidade reducida.
Nas últimas dúas semanas, producíronse outros dous cortes de case dúas horas na vía, que segue pendente dunha solución para os problemas de falta de visibilidade pola néboa.
O ano pasado a vía estivo preto de 1.000 horas pechada ao tráfico. A circulación prohíbese cando a visibilidade baixa dos 40 metros.
OPERACIÓN RETORNO
Desde este venres 30 de agosto e ata o domingo 1 de setembro, a DXT desenvolverá a operación especial de retorno do verán na que se intensificará a vixilancia.
Desde a Xefatura Provincial de Tráfico, fan un chamamento a extremar a precaución e ter especialmente en conta a peatóns, ciclistas e motociclistas.
Advirten que a A-8 e a A-6 son as vías que poden presentar maior intensidade circulatoria da provincia.
