O Parlamento de Galicia aprobou este xoves por unanimidade unha proposición non de lei do Grupo Mixto para instar á Xunta de Galicia a acometer a dragaxe do Porto Chico de Foz. É a segunda vez en 16 meses que a Cámara galega acorda reclamar ao Goberno galego a mellora integral do peirado de Tupide, despois de que no pasado mes de maio se cumprise un ano do respaldo, por consenso, dunha iniciativa de En Marea sen que se nese período se executase ningunha medida.
A proposición do Grupo Mixto, defendida pola deputada Paula Vázquez Verao na Comisión de Pesca do Parlamento, insta á Xunta a “entrevistarse cos colectivos profesionais, recreativos e culturais afectados polo estado de Porto Chico e, de acordo cos mesmos, presentar ante a Cámara un proxecto, con cronograma e partidas orzamentarias, para acometer unha mellora integral do mesmo”.
A iniciativa tamén fai fincapé en que o proxecto “contemple a mellora das condicións de abrigo do Porto Chico e da seguridade, así como o aumento de prazas de atraque“.
Vázquez Verao agarda que este acordo “se efectivice canto antes” sen que quede “en papel mollado”. A deputada do Grupo Mixto lamenta que “por parte da Xunta de Galicia e do Partido Popular (PP) se pretendía confundir a situación do peirao pesqueiro de Foz, dragado en 2018, co do Porto Chico, instalación que continúa no abandono“.
“A falta de abrigo, calado e seguridade do porto deportivo, así como a falta de prazas de amarre na vila, dada a elevada demanda, lastran as potencialidades de desenvolvemento do sector do mar”.
AS ZÓDIACS DE SOCORRISMO, SEN PODER SAÍR
A mellora integral do peirao de Tupide, “que demandan colectivos como a Asociación A Ribeira ou a Confraría de Pescadores“, lembra Vázquez Verao, suporía “resolver numerosos problemas”.
Entre eles, “sería base estable para as zódiacs de socorrismo e evitaría situacións como a deste verán, cando unha destas embarcacións de salvamento non puido saír porque quedara en seco“.
Tamén “usarían a instalación”, indica a deputada do Grupo Mixto, “embarcacións profesionais de pesca”, ademais de “ampliarse o seu uso náutico-deportivo, tanto recreativo como empresarial“.
