A néboa no Alto do Fiouco volveu provocar o peche da A-8. Un peche que xa se prolongou durante dous días e que mantén inoperativa a autovía durante a fin de semana, cando máis xente se achega á Mariña a disfrutar do tempo e das numerosas festas da localidade, entre elas a Festa Castrexa de Burela, o Mercado Renacentista de Viveiro ou o Ribadeo Indiano.
Hai un corte total á circulación entre os quilómetros 536 e 552, segundo confirmou a Dirección Xeral de Tráfico. Os vehículos que circulan en ambos os sentidos pola A-8 están obrigados a desviarse pola estrada Nacional 634 ao seu paso por Mondoñedo.
AS BALIZAS INTELIXENTES, INSUFICIENTES
A pesar de que en abril foi instalado un novo sistema de balizas intelixentes en climatoloxía adversa (BICA), o certo é que isto non evitou que o tráfico na Autovía do Cantábrico teña sido cortado en varias ocasións.
