A Garda Civil detivo na localidade de Burela a dous menores de idade, como supostos autores de varios delitos de danos en autobuses e no centro de saúde da localidade burelá.
Os feitos tiveron lugar o pasado mes de agosto, cando os presuntos autores produciron danos a autocares que se atopaban estacionados na estación de Burela, valorando os danos en 9.400 euros.
Así mesmo son os presuntos autores de danos ocasionados no centro de saúde de Burela. A investigación continúa aberta non descartando novas detencións relacionadas con estes feitos delituosos. As persoas detidas foron postas a disposición da Fiscalía de menores de Lugo.
FURTO NA DEVESA
Por outra banda, a Garda Civil imputou en calidade de investigado na localidade de Ribadeo a un veciño de Navia (Asturias) de 53 anos de idade como suposto autor dun delito de furto.
Os feitos ocorreron nun establecemento situado na Devesa, onde o presunto autor roubou unhas botas de traballo do interior do local comercial. A persoa investigada foi posta a disposición do Xulgado de Instrución nº 2 de Mondoñedo.
