A saída de vía dun camión na Autovía do Cantábrico (A-8) ao seu paso polo municipio lucense de Abadín mantén cortado o carril dereito de circulación en sentido Vilalba, o que provocou retencións de ata dous quilómetros nese punto, segundo informou a Dirección Xeral de Tráfico.

O accidente produciuse ás 11.35 horas, concretamente á altura do punto quilométrico 554.100, en sentido Vilalba, segundo informou o Subsector de Tráfico da Garda Civil de Lugo.

Por causas que aínda se descoñecen, o condutor perdeu o control do vehículo pesado, que acabou por saírse da vía pola marxe dereita.

Por mor deste sinistro, resultou ferido o condutor do camión, aínda que en principio as súas lesións non revestían gravidade, segundo as mesmas fontes.