EFE. Os billetes de tren volverán venderse desde este mércores de forma presencial nas estacións de ferrocarril nas que se deixou de prestar ese servizo o pasado 31 de decembro, entre elas Burela e Viveiro.
Segundo fontes do Ministerio de Transportes, Mobilidade e Axenda Urbana, de momento volverase á situación existente ata que, co cambio de ano, Renfe asumiu a venda de billetes en 142 estacións, “as de menor tráfico de viaxeiros”, nas que, ata ese momento, Adif ocupábase desa tarefa.
Trátase, segundo esas fontes, dunha “medida provisional“, ata o 31 de marzo, mentres se buscan “solucións definitivas” mediante acordos de colaboración con Deputacións e Concellos interesados en manter a venda presencial.
Tralo traspaso da venda de billetes de Adif a Renfe nesas 142 estacións, a compañía ferroviaria precisou que só se despacharían de forma presencial nas que superasen os cen viaxeiros diarios. No resto das estacións, os usuarios debían recorrer a outros medios de compra, como internet, teléfono ou máquinas de autoventa.
A recuperación do servizo suprimido era parte do acordo entre o PSOE e Teruel Existe para a investidura de Pedro Sánchez como presidente do Goberno. A medida colleitara critícas de partidos e sindicatos.
