O Concello de Viveiro manifestou a través dun comunicado de prensa o seu “malestar” polos prexuízos que o deficiente servizo da operadora Movistar está provocando na telefonía móbil da veciñanza de varias parroquias.

En concreto, recibiu numerosas queixas de residentes en parroquias como Chavín, Landrove, Galdo e Vieiro. O Concello de Viveiro considera “indignante que a compañía non teña unha oficina física na que os usuarios poidan presentar as súas reclamacións”.

De feito, o propio goberno local quixo comunicar á compañía as queixas transmitidas polos veciños e tampouco puido por ese motivo, por carecer dunha oficina física na que presentar a reclamación.

CAÍDA DUNHA ANTENA

O Concello ten constancia da presentación dunha queixa ao respecto ante o Instituto Galego de Consumo, na que se fai constar que, “segundo fontes non oficiais da compañía”, o problema deriva dunha caída de “tráfico” na antena situada no Monte Castelo.

Dende o Concello amósase un apoio total aos veciños afectados e comprende a súa preocupación pola situación, agardando que se arranxe pronto.