O Concello de Trabada anunciou este luns a creación da Escola de Música Moderna municipal. O goberno local sinala que o obxectivo ao poñer en marcha este proxecto educativo é “proporcionar á veciñanza unha formación musical de calidade á vez de enriquecer a cultura e o espírito do noso pobo”.
Segundo expuxo a alcaldesa trabadense, a socialista Mayra García Bermúdez, a iniciativa “baséase na premisa de que non existe unha idade establecida para aprender, polo cal a oferta educativa está aberta a calquera persoa indeferentemente da súa idade”.
As especialidades instrumentais ás que se pode optar, entre outras, son: piano, batería, guitarra, baixo eléctrico, saxofón, clarinete, gaita, acordeón e percusión tradicional, ademáis da materia de música e movemento para os nenos e nenas entre catro e oito anos.
Para explicar polo miúdo todos e cada un dos aspectos deste novo proxecto, o Concello convocou unha reunión informativa que se celebrará o mércores, 12 de febreiro ás 16.00 horas no CEIP Plurilingüe Celso Currás.
XORNADAS DE PORTAS ABERTAS NO COLEXIO
O propio colexio, que no último concurso perdeu a aula de infantil ao marchar unha das familias seleccionadas polo Concello para desfrutar de vivenda gratuíta a cambio de matrícula, terá xornadas de portas abertas do 10 ao 14 de febreiro.
