EFE. O Boletín Oficial do Estado (BOE) publica a orde que fixa as condicións nas que as persoas maiores de 14 anos poderán pasear e facer deporte individual sen contacto desde o sábado, durante unha vez ao día e sen límite de tempo, pero respectando uns horarios e mantendo a distancia de seguridade. Segundo a orde ditada polo Ministerio de Sanidade, para evitar aglomeracións as entidades locais facilitarán a repartición do espazo público a favor dos que camiñan e dos que van en bicicleta, tendo prioridade os primeiros.

– Quedan excluídas destas saídas as persoas que presenten síntomas ou estean en illamento domiciliario debido a un diagnóstico por coronavirus, ou que se atopen en período de corentena domiciliaria. Tampouco poden saír os residentes en centros sociosanitarios de maiores.

COMO MOITO, DÚAS PERSOAS NOS PASEOS

– Durante os paseos poderase saír acompañado dunha soa persoa coa que se convive.

– As persoas dependentes poderán facelo tamén acompañadas por unha persoa empregada de fogar a cargo ou coidadora habitual.

HORARIOS EN FUNCIÓN DA POBOACIÓN MUNICIPAL E DA IDADE

– Con carácter xeral, para os cidadáns maiores de 14 anos, a práctica de deporte individual e os paseos só se poderán levar a cabo entre as 6.00 horas e as 10.00 horas e entre as 20.00 horas e as 23.00 horas.

– Aquelas persoas que requiran saír acompañadas por motivos de necesidade e os maiores de 70 de anos poderán facelo entre as 10.00 horas e as 12.00 horas e entre as 19.00 horas e as 20.00 horas.

– Os nenos, acompañados dun adulto, poderán realizar un paseo diario, de máximo unha hora de duración e a unha distancia non superior a un quilómetro con respecto ao seu domicilio, entre as 12.00 horas e as 19.00 horas (a semana pasada o horario era de 9.00 a 21.00 horas).

– Nos municipios cunha poboación igual ou inferior a 5.000 habitantes as saídas poderán realizarse entre as 6.00 horas e as 23.00 horas. Neste sentido, desta norma benefícianse os veciños de doce de 16 concellos da Mariña, agás os de Viveiro, Burela, Foz e Ribadeo, que terán que someterse as restriccións mencionadas con anterioridade (de 6.00 a 10.00 e de 20.00 a 23.00 horas).

DISTANCIAS

– Os paseos realizaranse cunha distancia non superior a un quilómetro con respecto ao domicilio.

– A práctica non profesional de calquera deporte individual está permitida dentro do municipio onde se reside.

– Poderase circular por calquera vía ou espazo de uso público, incluídos os espazos naturais e zonas verdes autorizadas, aínda que non se poderá acceder a instalacións deportivas pechadas.

– Non se pode usar vehículo motorizado nin transporte público para desprazarse co fin de pasear ou facer deporte.

MEDIDAS DE PRECAUCIÓN

– Deberase manter unha distancia interpersoal con terceiros de polo menos dous metros e débense evitar os espazos concorridos, así como aqueles lugares onde poidan existir aglomeracións.

– Na medida do posible, os paseos e a actividade deportiva débese realizar de maneira continuada evitando paradas innecesarias nas vías ou espazos públicos. Cando sexa necesario, levará a cabo polo tempo estritamente necesario.

– Deberanse cumprir as medidas de prevención e hixiene fronte á Covid-19 indicadas polas autoridades sanitarias.

APP DA DEPUTACIÓN PARA MEDIR DISTANCIAS

A Deputación de Lugo activa a aplicación Mide a túa saída (https://mideatuasaida.deputacionlugo.org/) para facilitarlle aos cidadáns os desprazamentos que se poden realizar durante a desescalada do confinamento decretado pola crise do coronavirus. A ferramenta, moi doada de usar, calcula o límite exacto ao que pode chegar cada persoa dende a súa casa para desenvolver as actividades permitidas polas autoridades.

A aplicación pódese utilizar en calquera dispositivo electrónico, aínda que por comodidade e utilidade, recoméndase o seu uso en teléfonos móbiles ou tablets. Para poñela en funcionamento, hai que activar a ubicación no dispositivo e darlle permiso á web para acceder a esta información. Desta maneira, Mide a túa saída procede ao cálculo do perímetro, quedando rexistrada a posición inicial do usuario como punto de referencia, que debe ser o lugar no que se reside. A partir de aí, amosa un mapa que sinala cunha cor vermella o radio dun quilómetro ou de cinco, en función da actividade que se desexe desenvolver, saír cos nenos, dar un paseo ou desprazarse ás hortas de autoconsumo.

A web é gratuíta e anónima e non precisa que se descargue ningunha información no teléfono ou tablet, xa que funciona coa app Google Maps, que adoitan levar instalada os dispositivos por defecto.