EFE. A Inspección de Traballo remitiulle un informe á Alcoa e as empresas auxiliares que traballan para o complexo industrial da Mariña no que advirte á patronal de que non pode descontarlles aos traballadores das contratistas o salario correspondente ao pasado 20 de xullo, como consecuencia da folga iniciada polos empregados do complexo industrial de alúmina e aluminio.
Desa forma, explica a plataforma que agrupa aos traballadores de auxiliares de Alcoa, a autoridade laboral dálle a razón, despois de que a coordinadora sindical denunciase “peche patronal” imposto pola multinacional ao impedirlles a eses traballadores o acceso á fábrica de San Cibrao, co argumento de que “non estaba prevista carga de traballo para esa xornada de folga”.
DESCONTAR OS SOLDOS CONLEVARÍA UNHA INFRACCIÓN ADMINISTRATIVA
Así mesmo, segundo a plataforma, a autoridade laboral aclara que “se o persoal ve reducido o seu salario” como consecuencia dos servizos non prestados o pasado 20 de xullo, “ese feito sería constitutivo dunha infracción administrativa“.
“A plataforma valora que, desta forma, quedan amparados os dereitos dos traballadores e das traballadoras das auxiliares fronte ás pretensións de Alcoa de utilizar a convocatoria de folga na principal como escusa para parar a produción, reducir carga de traballo e aforrar diñeiro en contra do conxunto do persoal“, conclúe.
