A Fiscalía de Mondoñedo pide nove anos de cárcere, así como outros dez de liberdade vixiada, para un home de orixe caboverdiana, J. L. G. F., acusado de violar a unha muller en Burela.

Segundo o escrito de acusación, o acusado abordou na rúa á vítima, J. R., o 28 de marzo do 2017, sobre as 22.30 horas, “e agarrándoa por ambos brazos conduciuna ata un lugar afastado a empurróns“. Alí, atraeuna cara si mesmo, “para contra a súa vontade introducir a súa man no interior do seu pantalón ao que (a persoa agredida) opuxo resistencia”.

Neste contexto, “o acusado, que percibira a clara negativa da vítima aos seus desexos, agarrouna de novo e máis forte, comezou a baixarlle os pantalóns e empuxouna e unha vez que a tivo debaixo del, impedindo calquera posible reacción de defensa de J., que só puido berrar para pedir auxilio, tapándolle a boca o procesado cunha das súas mans e neutralizándoa co seu peso para rematar penetrándoa vaxinalmente“.

Como consecuencia da agresión sexual referida, a presunta vítima sufriu “lesións consistentes en rascado en coxa dereita, polas que recibiu para o seu total restablecimiento e curación unicamente unha primeira asistencia médica, no Servizo Galego de Saúde que segundo certificación de gastos que constan na causa ascende a un total de 595,05 euros”.

A Fiscalía entende que os feitos relatados son constitutivos dun delito de agresión sexual, polo que pide as penas de nove anos de cárcere, a prohibición de aproximarse á prexudicada a menos de 200 metros durante 16 anos, así como liberdade vixiada polo tempo de dez anos, ou no seu caso a expulsión do acusado do territorio estatal unha vez cumpra a parte determinada polo xuíz ou tribunal. Ademais, solicita unha indemnización por danos morais que ascende a 18.000 euros.