EFE. O presidente do comité de empresa de Alcoa San Cibrao, José Antonio Zan, considera que, despois do fallo do Tribunal Superior de Xustiza de Galicia (TSXG) que lle prohibe á multinacional parar as cubas de electrólise da fábrica de aluminio primario, é “un bo momento para que Roy Harvey“, presidente da multinacional norteamericana “interveña nesta situación”.
En declaracións a EFE, Zan dixo que “quedou claro” que “todos os que ten por baixo” e o bufete de avogados (Garrigues Walker) ao que fiou a negociación para aplicar o Expediente de Regulación de Emprego (ERE) na planta de San Cibrao “non conseguiron nada” e levaron á compañía a unha situación insoportable. Que deixen de ir pola autopista en dirección contraria”, salientou.
A través do comité europeo, do que Zan forma parte, “pedímoslle a Harvey que entrase en contacto connosco, que interviñese, porque permaneceu afastado deste proceso”, malia que no seu día foi director do complexo industrial de San Cibrao.
“Pedímoslle que tome as rendas para unha saída digna para as dúas plantas”, tanto a de alúmina como a de aluminio primario, porque “logo de tantos anos, non estaría ben que acabasemos como o rosario da aurora”, e menos “cando o Goberno estalle ofrecendo unha solución”.
LIBERTY HOUSE MANTÉN O INTERESE
Tamén dixo que Liberty House “continúa interesada” na compra e segue pensando que sería “unha saída boa” a adquisición das dúas plantas, polo que o comité insiste en pedirlle ao Goberno que “faga esa intervención” á que os propios xuíces fan referencia no auto.
A FOLGA DETÉN EN SAN CIBRAO MÁIS DE 40 MILLÓNS DE EUROS DE ALUMINIO
“Non se pode xogar ao despiste. O Goberno ten que sentar a Alcoa ou acometer a intervención”, para que “chegue unha solución”, dado que a “folga indefinida” que comezou a principios de outubro tamén está provocando “danos colaterais” en plantas de transformación que “dependen” do aluminio que sae de San Cibrao, como as de Amorebieta ou Alacante.
Sobre o paro, que está detendo a saída do produto do complexo industrial, Zan concretou que “temos máis de 40 millóns de euros en San Cibrao inmobilizados“, unha contía que ata o xuízo de impugnación do ERE “pode multiplicarse por tres ou por catro“.
“O comité xa fixo todo o que podía facer. Non se pode facer máis, logo de cinco meses de loita. Os traballadores de San Cibrao son un exemplo para toda España“, engadiu Zan, quen insistiu en que a solución está agora en mans de “Alcoa e do Goberno”. Sobre as mobilizacións, expuxo que mañá realizarase un pleno extraordinario, aínda que foi cauto “tendo en conta que hai problemas coa Covid-19 na comarca e para nós é fundamental non parar as instalacións”.
MESA MULTILATERAL
O presidente do comité confirmou que o secretario de Industria, Raül Blanco, púxose en contacto nas últimas horas cos representantes dos traballadores para informarlles de que nos próximos días reunirase a mesa multilateral polo futuro de Alcoa.
“Esperamos que se reúna antes do luns para tomar decisións“, dixo Zan, quen tamén confirmou que o comité recibiu onte a chamada do vicepresidente económico da Xunta, Francisco Conde, para felicitar aos seus representantes polo fallo xudicial.
