O Concello e maila Acisa traballan no vindeiro Ribadeo Indiano, que se celebrará do 12 ao 14 de xullo do 2019.
A sexta edición da festa estará adicada a Cuba, despois de que o pasado ano se recoñecese ao Uruguai, con numerosos actos en honra ao país suramericano.
O goberno local e máis o colectivo de comerciantes mantiveron unha xuntanza en Santiago de Compostela coa cónsul xeral e co cónsul da republica de Cuba para Galicia, Asturias e Cantabria, Yahima Martínez Millán e Ángel Aurelio Torres Jaime.
A concelleira de turismo, Ana Martínez, espuxo que “foi unha reunión na que puxemos en común moitas ideas e propostas, incluso novidosas, para a próxima edición deste evento. Arrancamos un contacto de traballo e iremos avanzando co tempo”, precisou.
Pola súa banda, o xerente de Acisa, Jesús Pérez, dixo que “tocamos diferentes temas relativos ao vindeiro Ribadeo Indiano e ao futuro proxecto a desenvolver. Queremos que haxa participación por parte cubana e no consulado de Cuba amosáronse moi dispostos a axudar en todo o que necesitemos”.
CRECEMENTO
Martínez e Pérez destacaron “a importancia” da festa para “Ribadeo e o seu comercio e hostalería”. Concello e Acisa mostraron a súa intención de “dar un paso máis” na sexta edición.
A pasada congregou 50.000 persoas durante a fin de semana, segundo os datos da organización, 10.000 máis ca edición de 2017.
