O Servizo Galego de Saúde (Sergas) concretou que só tres das 310 persoas analizadas dentro do cribado poboacional do concello de Xove resultaron positivas. No municipio xovense detectáronse 76 contaxios novos de coronavirus nos últimos 14 días.
O xerente da área sanitaria de Lugo, Cervo e Monforte, Ramón Ares, concretou que estaban citados para o cribado “especialmente aqueles veciños que pola súa actividade están expostos, os que traballan de cara ao público. Foron convocados distintos grupos cada media hora e fíxose con rapidez; agradecemos ao Concello e á veciñanza a súa colaboración”, explicou.
PROBAS A PERSOAS QUE TRABALLAN DE CARA AO PÚBLICO
En concreto, fíxose un cribado a traballadores de distintos colectivos, como comercios, bares, persoal do Servizo de Axuda non Fogar, así como a todos os empregados municipais.
Coas probas a “esta poboación asintomática, tentamos acotar na medida do posible o gromo que hai agora mesmo, para descubrir os positivos asintomáticos e facer con eles o illamento correspondente e con iso conseguir que deixen de transmitir a enfermidade”, afondou.
A situación epidemiolóxica da Mariña é, segundo Ares, “preocupante en liñas xerais, especialmente en Xove, onde hai un número importante de afectados na residencia, pero tamén no propio concello temos unha incidencia alta”.
Este municipio presenta, así, unha das incidencias máis altas de Galicia. Con todo, hai que ter en conta que se trata dunha poboación de pouco máis de 3.300 habitantes.
O alcalde, Demetrio Salgueiro, atribuíu esta situación “á gran cantidade de casos que hai na residencia da terceira idade, onde se superan os 30, o que fai o número total bastante elevado”.
A isto súmanse os contaxios, “outro trinta”, concentrados en “varios núcleos familiares”, dixo Salgueiro. “Polo demais aparece algún caso solto”, precisou.
“Estamos tranquilos, aínda que estamos en garda. Nos últimos días vese menos movemento polo pobo, a xente ten medo”, confesou o alcalde popular de Xove.
VIVEIRO ACUMULA 64 POSITIVOS, NOVE MÁIS
En Viveiro, concretou Ares, “que tamén preocupa, no día de onte saíron once positivos. Estamos tentando acotar as liñas de transmisión para desta forma comezar a conseguir diminuír o número de positivos novos”, precisou. No municipio viveirense detectáronse 64 casos nos últimos 14 días (nove máis dos comunicados onte).
Ademais, Ares salientou o caso de Burela, con 25 contaxios nas últimas dúas semanas; “ten un número importante de casos e xa está cunha incidencia acumulada elevada. Hai que estar moi vixiantes do que ocorre en Burela, e se non conseguimos acotar estas liñas de transmisión corremos o risco de ter que aplicar tamén medidas excepcionais como as que se aplican en Xove e Viveiro“, advertiu.
SOBRE A FESTA EN MEIRA: “ÁS VECES PAGAN TODOS POLOS ACTOS DUNS POUCOS”
“No resto da Mariña a situación está estabilizada. Temos casos en Ribadeo pero están fundamentalmente ligados ao Hospital Asilo“, matizou.
Sobre o resto da área sanitaria, en Lugo cidade e no sur da provincia, “a situación é estable, pero queremos ver cal é a repercusión que poidan ter estes días de festa, despois de ver imaxes como as de Meira ou as da cidade de Lugo. Incidimos na responsabilidade individual de cada un; a capital provincial pechou durante moito tempo e con comportamentos coma ese corremos o risco de ter que aplicar medidas; ás veces están a pagar todos polos actos duns poucos. Insistimos en que os cidadáns manteñan o distanciamento persoal, en que estean sempre cos mesmos grupos, en que laven as mans e usen a máscara”, concluíu.
A RESIDENCIA DE TRABADA, LIBRE DE COVID-19
A Deputación de Lugo confirmou que no último cribado realizado no centro de maiores de Trabada detectouse un positivo, o dunha traballadora, que se confirmou que se trata dun falso contaxio despois da realización doutra PCR a esta persoa. Deste xeito, o xeriátrico trabadense segue libre de Covid-19.
SEN NOVIDADES TRALA REUNIÓN DO COMITÉ CLÍNICO
Na Mariña non haberá novidades nos próximos días respecto das medidas adoptadas para conter o coronavirus, despois da reunión deste luns do comité clínico da Xunta de Galicia. Le todos os cambios adoptados nesta ligazón do Galicia Confidencial.
