Unha muller de 87 anos, procedente da residencia de Xove e diagnosticada de Covid-19, faleceu nas últimas horas no Complexo Hospitalario Universitario de Ourense (CHOU), segundo concretaron a última hora da tarde deste luns fontes do Servizo Galego de Saúde (Sergas).

Os usuarios positivos do abrocho da residencia San Bartolomeu, que xestiona a Fundación San Rosendo, estaban a ser trasladados tanto ao xeriátrico medicalizado de Santiago de Compostela, o Cegadi (Centro Galego de Desenvolvemento Integral), como ao centro de maiores dos Gozos, en Pereiro de Aguiar (Ourense).

Ademais desta residente do xeriátrico de Xove, tamén faleceron outras tres mulleres positivas, de 91, 84 e 83 anos, todas ingresadas no Complexo Hospitalario Universitario A Coruña (CHUAC). Dous homes, de 65 e 77 anos, morreron nas últimas horas no mesmo centro.

1.421 VÍTIMAS MORTAIS NA COMUNIDADE

Tamén faleceu, igualmente diagnosticado de coronavirus, un home de 78 anos no Hospital Modelo da Coruña. Todos tiñan patoloxías previas, segundo resalta a mesma fonte. Deste xeito, elévanse a 1.421 as vítimas mortais do coronavirus na comunidade.