Uns 70 vehículos de empresas de distribución para alimentación e hostalería, principalmente camións e furgonetas, marcharon desde Viveiro e Ribadeo para atoparse en Burela, onde reivindicaron axudas para un sector que languidece ante a paralización da actividade por mor do coronavirus. Os manifestantes colapsaron durante uns minutos a Avenida de Arcadio Pardiñas e a rúa Eijo Garay da vila burelá, cunha breve intervención na Praza do Concello, para facer ver a súa situación.
O sector séntese “esquecido. Producimos nesta provincia uns 800 postos de traballo directos, pero estamos un pouco olvidados. A hostalería pechou pero non contamos con ningunha axuda; se fosemos unha única empresa con esa cantidade de persoal estariamos no foco, pero non é así. Estamos paralizados contra a nosa vontade e necesitamos axuda”, expón Ángel Carreiras, de Distribuciones Carreiras, ubicada no polígono de Cuíña, en Cervo.
Neste contexto, resume, “as perdas non as poderiamos cuantificar, pero son montóns de miles de euros, todas as empresas levamos un ano con perdas. Temos traballadores en Erte se seguimos aguantando, pero non sabemos ata cando, porque se isto segue así será insostible. Hai moitas persoas que están cobrando un 70% menos e que non saben do seu futuro, eles están a consumir o paro e nós aguantando a súa parte da seguridade social. De continuar así pechariamos todas as empresas“, indica Carreiras.
BARES E RESTAURANTES, PECHADOS, SON “O 90% DO NEGOCIO”
José Antonio Veiga, de Discosta Norte (Ribadeo), expón que “movemos moitas familias. Aínda que estamos no sector da distribución non somos grandes plataformas, polo que ninguén sabe case ninguén que existimos. Cando se fala de axudas ninguén nos lembra, cando temos o grave problema da hostalería, que supón o 90/100% do noso negocio. De xeito que con estes peches deixamos de traballar, polo tanto, ao 90%. Notamos peches dos bares, xente que se está a endebedar… Un ICO é un préstamo para poder pagar impostos, as axudas teñen que vir doutra forma”, reclama.
“Somos empresas cun volume importante de infraestrutura; camións, persoal… En Discosta Norte temos 15 ou 16 vehículos e arredor de trinta traballadores. Agora mesmo temos tres ou catro persoas funcionando, nas oficinas principalmente, na rúa nada“, lamenta. Por iso pide “axudas a fondo perdido, como unha compensación por non deixarnos traballar”.
Liquidez urxente; Ertes ao 100%; a condonación de impostos; a bonificación dos combustibles; ou axudas compensatorias son as súas principais reclamacións.
“SOMOS O BANCO DA HOSTALERÍA”, SALIENTAN
Veiga insiste nunha idea na que coincide con Marcelino Fernández, de La Vivariense, a de estar “financiando agora mesmo a hostalería, que para a banca na actualidade é un sector tabú. Non vendemos pero tampouco cobramos o que temos vendido”, remarca. Fernández salienta que “somos un pouco o banco dos bares, e non cobramos porque están pechados. Hai hostaleiros que van cumprindo con certo atraso, pero hai outros casos nos que aguantamos por non perder un cliente, porque non se vai pagando, pero iso só se pode facer durante un tempo”, prosegue.
Sobre o futuro a medio prazo, Fernández asegura que “nas anteriores ocasións que estivemos pechados, catro en Burela, logo nos puxemos nun 85/90% da facturación anterior, pero agora parece que a xente está máis queimada pola situación e non sabemos o que nos imos atopar”, conclúe.
‘Non somos nin Gadisa nin Mercadona, somos distribuidores‘; ‘xeramos riqueza nos nosos concellos‘; ‘de nós viven centos de familias‘; ou ‘somos un motor do turismo‘ foron algúns dos lemas da protesta.
