Vítimas dos vídeos gravados con cámara oculta na festa da Maruxaina, no municipio de Cervo, convocaron para o vindeiro domingo, 4 de abril, unha concentración a fin de reclamar que non se arquive a denuncia presentada pola Asociación Mujeres en Igualdad de Burela (Bumei), tal e como decretou o Xulgado de Primeira Instancia e Instrución número 1 de Viveiro.
O xuíz non apreciou “suficientemente acreditada” a existencia dun delito de vulneración da intimidade nas gravacións realizadas a decenas de mulleres ouriñando nun calexón da vila de San Cibrao, nuns vídeos que posteriormente se publicaron en páxinas web pornográficas.
A protesta será en San Cibrao, ás 12.00 horas, na Praza dos Campos. As persoas afectadas piden apoio para a súa causa ante a “inxustiza” coa que “se está a tratar este tema”, podendo as persoas asistentes utilizar se o desexan a falda habitual da vestimenta da Maruxaina, que será o sinal de protesta.
RECOLLIDA DE SINATURAS
Bumei iniciou unha recollida de sinaturas contra o sobresemento do caso. Algo máis de 200 persoas asinaron a petición, que pode consultarse nesta ligazón. A asociación considera “indignante” que se “tenda a criminalizar ás mulleres en lugar de defendelas”, razón pola que quere dirixirse ao Parlamento de Galicia para que se posicionen respecto ao acontecido.
