O xefe de maquinas do buque pesqueiro ‘Pino Ladra‘, con base en Celeiro, foi evacuado polo helicóptero ‘Helimer 401’, de Salvamento Marítimo, tras sufrir na mañá deste martes, 27 de abril, un golpe nun ollo.

A petición de auxilio produciuse ás 8,07 horas e minutos máis tarde despegou desde o aeroporto coruñés de Alvedro, onde ten a súa base, a aeronave, que ás 9,24 horas xa tiña no interior do helicóptero ao ferido.

O evacuado foi levado ata o aeroporto situado en Culleredo, onde agardaba unha ambulancia de Urxencias Sanitarias de Galicia-061, para trasladar ao ferido a un centro hospitalario.