A subdelegada do Goberno en Lugo, Isabel Rodríguez, insta a Alcoa a “deixarse de escusas e vender” a fábrica de San Cibrao, en Cervo, “xa que non lle interesa”. A través dunha comunicación remitida aos medios, Rodríguez reivindica que “foi o Goberno quen buscou os compradores interesados na fábrica, despois de facilitarlle a continuidade do emprego e a actividade industrial na Mariña”.
Neste sentido, a subdelegada resalta que a planta “segue aberta, en contra do desexo de Alcoa, polo empeño dos traballadores, que –incide– sempre contaron co apoio do Goberno”.
E é que este xoves, tras unha nova reunión da mesa multilateral, os representantes do persoal criticaron que o Executivo central lles trasladara que non está disposto a que sexa a SEPI (sociedade estatal de participacións industriais) a que faga de intermediaria na operación de compravenda.
O BNG PIDE A INTERVENCIÓN
Pola súa banda, o BNG levará ao vindeiro pleno provincial a proposta que o comité de empresa de Alcoa San Cibrao trasladou aos grupos políticos provinciais para esixir ao Estado a intervención da fábrica de aluminio.
O voceiro nacionalista Efrén Castro explicou que “coas últimas noticias sobre o proceso de venda da fábrica, coa negativo do goberno a intervir directamente, esixen aumentar a presión social e política. Despois de meses de incerteza e sen avances, este paso atrás é inadmisible”
