O Concello de Foz pode presumir xa de Policía Local tras aumentar a plantilla a oito axentes. O alcalde, Fran Cajoto, mantivo unha reunión de traballo co corpo para dar a benvida aos dous novos axentes que se incorporaron esta fin de semana. Polo tanto agora conta con 8 efectivos.
“En período de prácticas, estes funcionarios supoñen un importante reforzo durante o verán, pasando a formar parte definitiva da plantilla unha vez rematada a súa formación”, explicou o rexedor municipal.
Fran Cajoto destacou que “a recuperación das baixas por xubilación era moi necesaria: polo tamaño de Foz e pola poboación que recibimos en verán. Deste xeito recuperamos o servizo de mañás e de tardes, de luns a domingo”, dixo nun comunicado.
Na reunión tamén se trataron temas moi importantes, como a programación de saídas para o control do ocio nocturno, a formación para o manexo do sonómetro recentemente adquirido ou a chegada dun etilómetro. Con el preténdese evitar o consumo de alcohol ao volante e tamén ter unha ferramenta moi necesaria para a investigación de accidentes.
“Vamos ser moi estritos porque a situación actual obriga máis ca nunca”, indicou o alcalde. Ademais apelou “á responsabilidade de todas e todos, sobre todo cunha incidencia de COVID á alza. Debemos evitar condutas incívicas como os botellóns, cando é evidente que non se poden facer, e accións de vandalismo. Coidar o pobo e a nosa saúde é cousa de todos”, rematou Cajoto.
