A dous días de que se reinicie a folga indefinida no complexo industrial de Alcoa en San Cibrao, o comité de empresa asegura que, neste momento, os traballadores non teñen “ningún contacto co Goberno”.

En declaracións a EFE, o seu presidente, José Antonio Zan, afirmou que a ministra de Industria, Reyes Maroto, “nin fala xa publicamente da situación de Alcoa nin nos chama“. De feito, confirmou que, desde que romperon as negociacións con Alcoa para levar a bo porto a venda da fábrica de aluminio primario, o comité de empresa non volveu a “saber nada” da titular de industria.

Desde o seu punto de vista, Alcoa “segue coa idea de esperar” á resolución do Tribunal Supremo en relación co recurso de casación que presentou á sentenza do Tribunal Superior de Xustiza de Galicia que anulou o ERE co que pretendía despedir a máis de cincocentos traballadores da fábrica de aluminio.

O Tribunal Supremo avaliará ese recurso o próximo 20 de outubro, lembrou Zan, e a multinacional está á espera de coñecer que camiño tomará o conflito laboral exposto.
“Aquí hai unha empresa que non quere vender e un Goberno que non quere comprometerse. Así é difícil chegar a unha solución”, lamentou.

Os traballadores de Alcoa reiniciarán o luns a folga indefinida e as mobilizacións na fábrica de San Cibrao.