O conselleiro de Economía, Emprego e Industria, Francisco Conde, criticou a inacción do Executivo respecto da situación de Alcoa, que considera “bloqueada” por parte do Goberno central, que “non está a reaccionar para pechar a venda”.
Na presentación este sábado do Encontro Nacional de Deseño no Centro Galego de Arte Contemporánea (CGAC), o conselleiro apostou pola opción da intervención temporal pública. “É o camiño para que, a partir de aí, Alcoa poida dar unha resposta, xa que non quere continuar coa produción en Galicia”, defendeu.
Conde insistiu en que “se ten que producir un entendemento” entre Alcoa e o Goberno. “Non podemos esperar máis tempo. Non podemos permitir que, nestes momentos de incerteza, siga habendo inacción por parte do Goberno e de Alcoa”, criticou, tras o que destacou que a Xunta “seguirá ao lado dos traballadores”.
