O Concello de Foz adxudicou a reforma das rúas Limoeiros e Calvario por procedemento aberto á empresa Construcciones y Canalizaciones José Saa SL, por un importe de 57.786 euros, con cargo a fondos do Plan Único 2021 da Deputación.

O alcalde, Fran Cajoto, explica que “as obras na rúa Limoeiros pódense dividir en dous tramos: entre Paco Maañón e a Congostra do Cura a renovación será total”. A esta parte só poderán acceder os vehículos dos residentes e a plataforma será única e terá un carácter eminentemente peonil, con firme de formigón impreso.

Tamén haberá unha nova varanda de protección, un colector de pluviais de PVC para avanzar na rede separativa e renovarase o abastecemento e outras tubaxes onde sexa preciso. E entre a Congostra do Cura e a Rúa do Porto “mellorarase o firme con aglomerado en quente e disporase nova sinalización, nun viario que pasará a ser dun único sentido de circulación” declarou Cajoto.

O rexedor municipal engade que “na Rúa do Calvario renovarase o firme con aglomerado en quente entre Álvaro Cunqueiro e a Rúa do Pilar, tramo que presenta un grave deterioro. A actuación completarase coa sinalización horizontal”.