O Ministerio de Transportes somete a información pública o proxecto de trazado das obras do tramo entre Burela e Foz da autovía da Mariña, A-74. O orzamento estimado ascende a 126,1 millóns de euros. Así se publica este mércores no Boletín Oficial do Estado (BOE), despois de que a ministra de Transportes, Raquel Sánchez, anunciase esta actuación a pasada semana nunha visita a Santiago.
A autovía A-74, que se concibiu como a continuidade do eixo cantábrico no norte de Galicia, a través da Mariña lucense, enlazará coa Vía de Alta Capacidade da Costa Norte (C.G. 2.3) de titularidade autonómica.
Esta autovía suporá un itinerario alternativo á estrada N-642, que serve de conexión aos concellos de Barreiros, Foz, Burela e Cervo, ademais do porto de interese xeral de San Cibrao.
A N-642 presenta unhas marxes consolidadas urbanisticamente en moitos tramos. A A-74 captará tráficos de curto, medio e longo percorrido, o que liberará travesías densamente poboadas de importantes tráficos, segundo explica o Ministerio.
MÁIS DE 9 QUILÓMETROS
A lonxitude do tramo obxecto do proxecto de trazado é de 9,2 quilómetros, ao que hai que engadir a conexión provisional na ligazón de Foz que ten unha lonxitude de 1,6 quilómetros.
Terá tres enlaces: Burela, Cangas e Foz (este último proxectado parcialmente como conexión provisional); e disporá de 18 estruturas: 6 viadutos, 5 pasos superiores, 3 pasos inferiores e 4 muros, destacando o viaduto sobre o río Ouro de 660 metros de lonxitude.
