O BNG de Foz sinala que a Consellería de Educación non autorizou a creacíón do ciclo de Turismo de FP Dual no IES da localidade. Nunha nota publicada este xoves, os nacionalistas focegos apuntan que durante o pasado mes de abril conseguírase a aprobación do pleno municipal ás xestións da equipa directiva do IES para implantar o ciclo de FP Dual de Turismo no centro. Segundo o comunicado do BNG, a Consellaría de Educación finalmente non autorizou a creación deste ciclo.
Ademais, o BNG denuncia a perda de 6 docentes con respecto ao cadro de persoal do centro o pasado curso. Todo isto acontece “cando nos orzamentos de 2022 as partidas destinadas ao ensino privado subvencionado (concertado), suben oito millóns de euros, alcanzando os 333,3 millóns”. Na nota de prensa o BNG de Foz apunta que en 2019 a suba foi de 19 millóns de euros máis para o ensino concertado.
Por outra parte, en educación infantil denuncian que novamente hai nenos e nenas en listas de agarda “a pesar de contar no edificio da Galiña Azul de espazo infrautilizado po lo desinterese da Consellería”. Xunto a isto denuncian a posibilidade de pechar o ciclo de adultos que “finalmente non foi executado mais que foi anunciado po la inspección segundo puido saber o BNG de Foz”.
